अंश मिश्रा, श्रीवत्स कुलकर्णी, रुद्राक्ष बोडके, जय हारदे यांची चमकदार कामगिरी
छत्रपती संभाजीनगर ः महाराष्ट्र क्रिकेट संघटनेतर्फे आयोजित एमसीए अंडर १९ दोन दिवसीय लीग क्रिकेट स्पर्धेत सीएनए संघाने चुरशीच्या सामन्यात छत्रपती संभाजीनगर संघावर पाच विकेट राखून विजय संपादन केला. अंश मिश्रा याने सामनावीर किताब संपादन केला. छत्रपती संभाजीनगरच्या श्रीवत्स कुलकर्णी, रुद्राक्ष बोडके यांनी शानदार कामगिरी नोंदवली.
एमआयटी क्रिकेट स्टेडियमवर हा रंगतदार सामना झाला. छत्रपती संभाजीनगर संघाने प्रथम फलंदाजी करत प हिल्या डावात ६३ षटकात सर्वबाद २८६ धावा काढल्या. त्यानंतर सीएनए संघाला ५६.४ षटकात २४२ धावांवर रोखून छत्रपती संभाजीनगर संघाने ४४ धावांची आघाडी घेतली. सामना निर्णायक जिंकण्यासाठी छत्रपती संभाजीनगर संघाने दुसऱया डावात आक्रमक फलंदाजी केली. मात्र, हा प्रयत्न अंगलट आला. छत्रपती संभाजीनगर संघाचा दुसरा डाव ३१.३ षटकात ११४ धावांवर गडगडला. त्यामुळे सीएनए संघाला सामना जिंकण्याची संधी मिळाली. सीएनए संघाने २२.५ षटकात पाच बाद १६० धावा फटकावत पाच विकेट राखून सामना जिंकला.
या सामन्यात सार्थक करोसिया याने ७१ धावा फटकावल्या. त्याने १३ चौकार मारले. रुद्राक्ष बोडके याने दोन षटकार व नऊ चौकारांसह ७० धावांची खेळी केली. कृष्णा पांडे याने १० चौकारांसह ६४ धावांचे योगदान दिले.
गोलंदाजीत छत्रपती संभाजीनगर संघाचा कर्णधार श्रीवत्स कुलकर्णी याने ६३ धावांत सहा विकेट घेऊन संघाला आघाडी मिळवून देण्यात मोलाचा वाटा उचलला. अंश मिश्रा यने ३६ धावांत सहा विकेट घेत संघाचा विजयाचा मार्ग सुकर बनवला. जय हारदे याने ३७ धावांत तीन गडी बाद केले.
या सामन्यात छत्रपती संभाजीनगरच्या रोहित पाटील (४१), श्रीवत्स कुलकर्णी (५४, ३२), सुमित सोळुंके (नाबाद ३१, २७) यांनी सुरेख फलंदाजी केली. पहिल्या डावात आघाडी घेतल्यानंतर निर्णायक विजयासाठी छत्रपती संभाजीनगर संघाने प्रयत्न केले. कर्णधार श्रीवत्स कुलकर्णी याने फलंदाजीत ८६ धावा आणि गोलंदाजीत सात विकेट घेत अष्टपैलू कामगिरी बजावली. श्रीवत्स कुलकर्णी याला आंतरराष्ट्रीय क्रिकेट प्रशिक्षक कर्मवीर लव्हेरा यांचे मार्गदर्शन लाभले आहे. या प्रयत्नात छत्रपती संभाजीनगर संघाचा दुसरा डाव अपेक्षेप्रमाणे लवकर संपुष्टात आला. त्याचा फायदा उठवत सीएनए संघाने निर्णायक विजय नोंदवला.
