जिल्हा क्रीडा अधिकारी पल्लवी धात्रक यांचे आवाहन
नागपूर (सतीश भालेराव) ः मिशन लक्ष्यवेध अंतर्गत राज्यातील खासगी क्रीडा अकादमींचे सक्षमीकरण करण्यात येणार आहे. त्यासाठी आर्थिक सहाय्य क्रीडा खात्यातर्फे करण्यात येणार आहे. या योजनेसाठी नागपूर जिल्ह्यातील क्रीडा अकादमींनी आपले प्रस्ताव सादर करावेत असे आवाहन जिल्हा क्रीडा अधिकारी पल्लवी धात्रक यांनी केले आहे.
महाराष्ट्र राज्यात क्रीडा संस्कृतीचे संवर्धन, प्रचार व प्रसार करण्यासाठी तसेच प्रतिभावान खेळाडू तयार करण्यासाठी शासन सतत प्रयत्नशील आहे. राज्यातील खेळाडूंनी ऑलिम्पिक सारख्या आंतरराष्ट्रीय क्रीडा स्पर्धेत पदके जिंकावीत यासाठी नियोजनबद्ध प्रयत्न होणे गरजेचे आहे. राज्यातील खेळाडूंसाठी अद्ययावत क्रीडा प्रशिक्षण यंत्रणा, क्रीडा विषयक पायाभूत सुविधा, क्रीडा वैद्यकशास्त्र, क्रीडा स्पर्धांचे आयोजन, खेळाडूंना पुरस्कार व प्रोत्साहन, खेळाडूंकरिता करियर मार्गदर्शन, खेळाडूंच्या क्षमता विकसित करण्यासाठी देशी व विदेशी प्रशिक्षक व संस्थांचे सहयोग या सर्व घटकांना विकसित करण्यासाठी महाराष्ट्र शासनाने मिशन लक्ष्यवेध या महत्त्वाकांक्षी योजनेची अंमलबजावणी राज्याच करण्याचा निर्णय घेतला आहे.
मिशन लक्ष्यवेध या योजने अंतर्गत निवडण्यात आलेल्या क्रीडा प्रकारांमध्ये अँथलेटिक्स, आर्चरी, बॅडमिंटन, बॉक्सिंग, हॉकी, लॉन टेनिस, रोईंग, शुटींग, रोलिंग, टेबल टेनिस, वेटलिफ्टिंग, कुस्ती या १२ खेळांचा समावेश करण्यात आला आहे. या १२ क्रीडा प्रकारांच्या राज्यातील उत्तम खेळाडू निर्माण करणाऱया खासगी क्रीडा अकादमींना आर्थिक सहाय्य देऊन अशा संस्थांचे सक्षमीकरण करण्यात येणार असल्याचे जिल्हा क्रीडा अधिकारी पल्लवी धात्रक यांनी सांगितले. या योजनेत नागपूर जिल्ह्यातील खासगी क्रीडा अकादमींनी प्रस्ताव सादर करावेत असे आवाहन पल्लवी धात्रक यांनी केले आहे.
या योजनेची अधिक माहिती देताना जिल्हा क्रीडा अधिकारी पल्लवी धात्रक म्हणाल्या की, मिशन लक्ष्यवेध अंतर्गत खासगी अकादमींना आर्थिक सहाय्य करण्याच्यादृष्टीने संबंधित क्रीडा अकादमीतील खेळाडू, क्रीडा मार्गदर्शक, सहाय्यक प्रशिक्षक, प्रशिक्षणासाठी उपलब्ध पायाभूत सुविधा, त्यांचा दर्जा, क्रीडा साहित्य व क्रीडा अकादमीच्या कामगिरीचे गुणांकन करण्यात येऊन ३५ ते ५० गुण प्राप्त करणाऱया संस्था क वर्ग, ५१ ते ७५ गुण प्राप्त करणाऱया संस्था ब वर्ग आणि ७६ ते १०० प्राप्त गुण प्राप्त करणाऱया संस्था अ वर्ग अशा प्रकारे वर्गीकरण करण्यात येणार आहे. क वर्ग (१० लाख), ब वर्ग (२० लाख) आणि अ वर्ग (३० लाख) अशा पद्धतीने आर्थिक सहाय्य, पायाभूत क्रीडा सुविधा उभारणी, क्रीडा सुविधा अपग्रेड करणे, प्रशिक्षक मानधन, क्रीडा व प्रशिक्षण उपकरणे आदी बाबींवर खर्च करण्यासाठी देण्यात येणार आहे.
मिशन लक्ष्यवेध योजनेचा लाभ घेऊ इच्छिणाऱ्या क्रीडा अकादमी, संस्थांनी अधिक माहिती व अर्जाच्या नमुन्यासाठी जिल्हा क्रीडा अधिकारी कार्यालयाशी संपर्क साधावा असे आवाहन क्रीडा सहसंचालक सुधीर मोरे यांनी केले आहे. नागपूर जिल्ह्यातील क्रीडा संस्था, क्रीडा अकादमींनी नागपूर जिल्हा क्रीडा अधिकारी पल्लवी धात्रक यांच्याशी संपर्क साधावा. खासगी क्रीडा अकादमींना भरुन द्यावयाचा अर्ज नमुना जिल्हा क्रीडा अधिकारी कार्यालयात उपलब्ध करुन देण्यात आलेला आहे.
