गुजरात संघाने आरसीबीची विजयी घोडदौड रोखली 

जोस बटलरच्या धमाकेदार फलंदाजीने गुजरातचा आठ विकेटने विजय 

बंगळुरू : जोस बटलर (नाबाद ७३) आणि साई सुदर्शन (४९) यांच्या स्फोटक फलंदाजीच्या बळावर गुजरात टायटन्स संघाने आरसीबी संघावर आठ विकेट राखून दणदणीत विजय साकारला. आरसीबी संघाचा आयपीएल स्पर्धेतील हा पहिला पराभव आहे. 

गुजरात टायटन्स संघासमोर विजयासाठी १७० धावांचे लक्ष्य होते. कर्णधार शुभमन  गिल व साई सुदर्शन या सलामी जोडीने आक्रमक सुरुवात केली. भुवनेश्वर याने गिलची वेगवान खेळी १४ धावांवर संपुष्टात आणली. गिलने एक षटकार व एक चौकार मारला. साई सुदर्शन व जोस बटलर या जोडीने दुसऱ्या विकेटसाठी ७५ धावांची भागीदारी करुन संघाचा विजय निश्चित केला. साई सुदर्शनची धमाकेदार खेळी ४९ धावांवर संपुष्टात आली. त्याचे अर्धशतक एका धावेने हुकले. त्याने सात चौकार व एक षटकार मारला. 

१३व्या षटकात गुजरात संघाला दुसरा धक्का बसला. मात्र, तोपर्यंत धावफलकावर १०७ धावा होत्या. जोस बटलर याने दमदार फलंदाजी करत धावगती कायम ठेवली. रदरफोर्ड याने वेगवान फलंदाजी करत बटलर याला सुरेख साथ दिली. बटलर याने अवघ्या ३९ चेंडूंचा सामना करत नाबाद ७३ धावा फटकावल्या. बटलरने पाच चौकार व सहा टोलेजंग षटकार ठोकले. रदरफोर्ड याने विजयी षटकार मारला. त्याने १८ चेंडूत एक चौकार व तीन षटकार मारले. गुजरात संघाने १७.५ षटकात दोन बाद १७० धावा फटकावत आठ विकेटने दिमाखदार विजय नोंदवला. भुवनेश्वर (१-२३) व हेझलवुड (१-४३) यांनी प्रत्येकी एक गडी बाद केला. 

आरसीबी संघाचा धावांसाठी संघर्ष 

प्रथम फलंदाजी करताना रॉयल चॅलेंजर्स बंगळुरू संघाने १६९ धावा केल्या. आरसीबीच्या फलंदाजांना त्यांच्या घरच्या मैदानावर सुरुवातीपासूनच संघर्ष करावा लागला. विराट कोहली आणि कर्णधार रजत पाटीदार यांच्यासह अनेक मोठे फलंदाज अपयशी ठरले. मोहम्मद सिराजच्या घातक गोलंदाजीपुढे आरसीबीचे तीन फलंदाज बाद झाले. त्याचवेळी, आरसीबी संघासाठी सर्वाधिक धावा करणारा खेळाडू लियाम लिव्हिंगस्टोन होता. त्याने आक्रमक फलंदाजी करत ५४ धावा केल्या.

चिन्नास्वामी स्टेडियमवर खेळल्या जाणाऱ्या या सामन्यात गुजरात टायटन्स संघाने नाणेफेक जिंकून प्रथम गोलंदाजी करण्याचा निर्णय घेतला. गुजरातची ४ वेगवान गोलंदाजांची रणनीती पुन्हा एकदा प्रभावी ठरली. सुरुवातीच्या षटकांमध्ये, अर्शद खान आणि मोहम्मद सिराज यांनी आरसीबीची फलंदाजी उद्ध्वस्त केली होती. प्रथम, विराट कोहली बाद झाला, ज्याने ७ धावा केल्या, तर देवदत्त पडिकल देखील ४ धावा करून बाद झाला. फिल साल्ट आणि कर्णधार रजत पाटीदार काही काळ क्रीजवर राहिले, परंतु ते देखील अनुक्रमे १४ आणि १२ धावा करून बाद झाले.

परदेशी खेळाडूंनी आरसीबीचा सन्मान वाचवला
आरसीबीची अवस्था इतकी वाईट होती की संघाचे पहिले चार फलंदाज ४२ धावांवर बाद झाले. विराट कोहली आणि रजत पाटीदार यांच्यासह सर्व प्रसिद्ध खेळाडू अपयशी ठरले. दरम्यान, लियाम लिव्हिंगस्टोनने जबाबदारी स्वीकारली आणि जितेश शर्मासोबत त्याने ५२ धावांची महत्त्वपूर्ण भागीदारी केली. जितेशने ३३ धावांची खेळी केली. एकीकडे, लिव्हिंगस्टोनने ५४ धावांच्या खेळीमध्ये १ चौकार आणि ५ षटकार मारले. दुसरीकडे, टिम डेव्हिड शेवटच्या षटकापर्यंत क्रीजवर राहिला आणि त्याने १८ चेंडूत ३२ धावांची जलद खेळी केली.

मोहम्मद सिराजची घातक गोलंदाजी
आरसीबीचा माजी खेळाडू मोहम्मद सिराज, जो आता गुजरात टायटन्सकडून खेळत आहे, त्याने गोलंदाजीत कहर केला. त्याने ४ षटकांत फक्त १९ धावा देत ३ बळी घेतले. गुजरातकडून साई किशोर हा दुसरा सर्वात यशस्वी गोलंदाज होता, ज्याने आरसीबीच्या २ फलंदाजांना पॅव्हेलियनमध्ये पाठवले. त्याच्याशिवाय अर्शद खान, प्रसिद्ध कृष्णा आणि इशांत शर्मा यांनी प्रत्येकी एक विकेट घेतली.