व्यंकटेश अय्यर, रघुवंशी, वैभव अरोरा, वरुण चक्रवर्तीची शानदार कामगिरी
कोलकाता : व्यंकटेश अय्यर (६०), रघुवंशी (५०), वैभव अरोरा (३-२९) आणि वरुण चक्रवर्ती (३-२२) यांच्या दमदार कामगिरीच्या आधारावर गतविजेत्या केकेआर संघाने आयपीएल स्पर्धेत चार सामन्यांत दुसरा विजय साकारला. केकेआर संघाच्या सर्वच गोलंदाजांनी घातक गोलंदाजी केली. त्यामुळे हैदराबाद संघ कधीही विजयाच्या शर्यतीत दिसून आला नाही. हैदराबाद संघ अवघ्या १२० धावांत गारद झाला. केकेआर संघाने तब्बल ८० धावांनी विजय मिळवला.
सनरायझर्स हैदराबाद संघासमोर विजयासाठी २०१ धावांचे आव्हान होते. सनरायझर्स संघ मोठी धावसंख्या सहजरित्या उभारण्यात तज्ज्ञ मानला जातो. परंतु, या सामन्यात हैदराबाद संघाची अतिशय खराब सुरुवात झाली. २.१ षटकात हैदराबाद संघाने ट्रॅव्हिस हेड (४), अभिषेक शर्मा (२) व इशान किशन (२) या सारखे धमाकेदार फलंदाज गमावले होते. सातव्या षटकात नितीश रेड्डी १९ धावांचे योगदान देऊन तंबूत परतला.
वैभव अरोरा याने हेड व इशान किशन यांना बाद करुन हैदराबाद संघाला मोठा धक्का दिला. राणा व रहाणे यांनी सुरेख झेल टिपले. हर्षित राणा याने अभिषेकला बाद केले. अरोरा, राणा व रसेल या वेगवान गोलंदाजांनी अतिशय घातक गोलंदाजी केली. हैदराबाद संघाला या वेगवान गोलंदाजांच्या शानदार कामगिरीने मोठा धक्का बसला.
कामिंदु मेंडिस आक्रमक फलंदाजी करत होता. सुनील नरेन याने त्याला २७ धावांवर बाद करुन हैदराबाद संघाला पाचवा धक्का दिला. १०व्या षटकात हैदराबादची स्थिती पाच बाद ६६ अशी बिकट झाली. त्यानंतर कामिंदु मेंडिस व हेनरिक क्लासेन यांनी आक्रमक फटकेबाजी करत थोडी आशादायक परिस्थिती निर्माण केली. परंतु, सुनील नरेन याने मेंडिस (२७), वरुण चक्रवर्तीा याने अनिकेत वर्माला (६) बाद करुन हैदराबादची स्थिती अधिक दयनीय केली. वैभव अरोरा याने क्लासेनची आक्रमक ३३ धावांची खेळी संपुष्टात आणली. क्लासेनने दोन षटकार व दोन चौकार मारले. १५व्या षटकात क्लासेन बाद झाल्यानंतर हैदराबादची विजयाची आशा संपुष्टात आली.
हैदराबाद संघाचा डाव १६.४ षटकात १२० धावांवर संपुष्टात आला. हैदराबाद संघाला तब्बल ८० धावांनी पराभव स्वीकारावा लागला. हा हैदराबादचा मोठा पराभव आहे. वैभव अरोरा (३-२९), वरुण चक्रवर्ती (३-२२), आंद्रे रसेल (२-२१) यांच्या प्रभावी व घातक गोलंदाजीसमोर हैदराबाद संघ सपशेल पराभूत झाला.
व्यंकटेश अय्यरची दमदार फलंदाजी
कोलकाता नाईट रायडर्सने प्रथम फलंदाजी करताना २०० धावसंख्या उभारली. अतिशय संथ सुरुवातीनंतर केकेआरने डावाचा शेवट वादळी पद्धतीने केला. एकेकाळी कोलकात्याला १५० धावांपर्यंत पोहोचणे कठीण वाटत होते, परंतु वेंकटेश अय्यर आणि रिंकू सिंग यांच्यातील ९१ धावांच्या भागीदारीमुळे केकेआरला सामन्यात जोरदार पुनरागमन करण्यास मदत झाली. व्यंकटेश अय्यरने ६० धावांची शानदार खेळी केली, तर रिंकू सिंगही ३२ धावा करून नाबाद परतला. अंगकृष्ण रघुवंशी याने अर्धशतक साजरे केले.
केकेआरने ५ षटकांत ७८ धावा केल्या
कोलकाता नाईट रायडर्सची सुरुवात खूपच वाईट झाली. क्विंटन डी कॉक आणि सुनील नारायण १६ धावांवर पॅव्हेलियनमध्ये परतले होते. नंतर, अजिंक्य रहाणे आणि अंगकृष रघुवंशी यांनी ८१ धावा जोडल्या पण धावगती नियंत्रित होती. एकेकाळी कोलकाताने १५ षटकांत १२२ धावा केल्या होत्या आणि २०० धावा करणे जवळजवळ अशक्य वाटत होते.
येथून व्यंकटेश अय्यर आणि रिंकू सिंग यांनी जबाबदारी स्वीकारली. एकीकडे, अय्यरने २९ चेंडूत ७ चौकार आणि ३ षटकारांसह ६० धावांची तुफानी खेळी केली. रिंकू सिंग १७ चेंडूत ३२ धावा करून नाबाद परतली. या दोघांमुळे कोलकाताने शेवटच्या ५ षटकांत ७८ धावा केल्या आणि संघाचा धावसंख्या २०० धावांवर नेला. खरं तर, कोलकाताच्या मोठ्या धावसंख्येचा पाया रघुवंशीने घातला होता, ज्याच्या बॅटने ३२ चेंडूत ५० धावा काढल्या.
व्यंकटेश अय्यरचा २३ कोटी रुपयांचा फॉर्म
मेगा लिलावात व्यंकटेश अय्यरला केकेआरने २३.७५ कोटी रुपयांना खरेदी केले. अय्यरने आतापर्यंत आयपीएल २०२५ च्या दोन डावांमध्ये फक्त ९ धावा केल्या आहेत, परंतु तिसऱ्या डावात त्याने आपला २३ कोटींचा फॉर्म दाखवला आहे. हैदराबादविरुद्धच्या सामन्यात २०६.९ च्या तुफानी स्ट्राईक रेटने खेळून त्याने जगाला त्याच्या क्षमतेची जाणीव करून दिली आहे.
