अंतिम सामन्यात गुजरात महिला संघाचा ४० धावांनी पराभव
अहमदाबाद : गुजरात क्रिकेट संघटनेतर्फे आयोजित करण्यात आलेल्या पश्चिम विभागीय १७ वर्षांखालील महिला एकदिवसीय लीग क्रिकेट स्पर्धेत महाराष्ट्र महिला संघाने विजेतेपद पटकावले. शेवटच्या सामन्यात महाराष्ट्र महिला संघाने गुजरात महिला संघाचा ४० धावांनी पराभव करत ट्रॉफी जिंकली.
गुजरात कॉलेज क्रिकेट मैदानावर ही स्पर्धा घेण्यात आली. महाराष्ट्र महिला संघाने नाणेफेक जिंकून प्रथम फलंदाजी करण्याचा निर्णय घेतला. महाराष्ट्र महिला संघाने धमाकेदार फलंदाजी करत ४० षटकात आठ बाद १९५ धावसंख्या उभारुन सामन्यावर वर्चस्व गाजवले. प्रत्युत्तरात गुजरात महिला संघ ३९.५ षटकात १५५ धावांत सर्वबाद झाला. महाराष्ट्र महिला संघाने ४० धावांनी सामना जिंकला व ट्रॉफी पटकावली.
या सामन्यात भाविका अहिरे हिने १०० चेंडूत ८३ धावांची शानदार खेळी केली. भाविकाने आक्रमक अर्धशतक काढताना नऊ चौकार व एक षटकार मारला. चार्ली सोळंकी हिने ८० चेंडूत ५९ धावा फटकावल्या. मयुरी थोरात हिने ६५ चेंडूत ४२ धावा काढल्या. मयुरीने तीन चौकार मारले. गोलंदाजीत वैष्णवी म्हाळसकर हिने २३ धावांत चार विकेट घेऊन संघाच्या विजेतेपदात मोलाचा वाटा उचलला. पायल हिने ३९ धावांत तीन गडी बाद केले. जान्हवी वीरकर हिने २७ धावांत दोन बळी मिळवले.
संक्षिप्त धावफलक : महाराष्ट्र महिला संघ : ४० षटकात आठ बाद १९५ (ईश्वरी अवसरे १७, सुहानी कहांडळ ५, भाविका अहिरे ८३, सह्याद्री कदम ७, मयुरी थोरात ४२, निकिता सिंग नाबाद १०, गायत्री सुरवसे नाबाद ६, इतर १९, पायल ३-३९, गौरी गोयल २-३५, रिया पटेल १-४५, बाराटे १-३२) विजयी विरुद्ध गुजरात महिला संघ : ३९.५ षटकात सर्वबाद १५५ (व्हेनिशा गज्जर ११, चार्ली सोळंकी ५९, परमार ६, दिव्या वरधानी २१, रिया पटेल १०, गौरी गोयल १८, वैष्णवी म्हाळसकर ४-२३, रोशनी पारधी २-३३, जान्हवी वीरकर २-२७, गायत्री सुरवसे १-२८, ईश्वरी अवसरे १-१६).
