ज्युदोपटू श्रद्ध चोपडेचा शिवछत्रपती राज्य क्रीडा पुरस्काराने सन्मान

वडील कडूबाळ चोपडे यांनी स्वीकारला पुरस्कार

छत्रपती संभाजीनगर ः पुणे येथे बालेवाडी क्रीडा संकुलात शिवछत्रपती राज्य क्रीडा पुरस्कार वितरण सोहळा पार पडला. या सोहळ्यात छत्रपती संभाजीनगरची आंतरराष्ट्रीय ज्युदो खेळाडू श्रद्धा चोपडे हिला शिवछत्रपती राज्य क्रीडा पुरस्कार प्रदान करुन सन्मानित करण्यात आले. श्रद्धा चोपडे ही एशियन चॅम्पियनशिप स्पर्धेसाठी जपानला गेलेली असल्यामुळे तिचे वडील कडूबाळ चोपडे यांनी हा पुरस्कार स्वीकारला. 

छत्रपती संभाजीनगर जिल्हा ज्युदो संघटनेच्या वाळूज एमआयडीसीतील बजाजनगर व्यायाम व क्रीडा प्रसारक मंडळाच्या श्रीमती परमेश्वरी देवानी ज्युदो प्रशिक्षण केंद्रातील बजाजनगर ज्युदो क्लबची आंतरराष्ट्रीय ज्युदो खेळाडू श्रद्धा कडूबाळ चोपडे जपानला एशियन चॅम्पियनशिप स्पर्धेसाठी गेलेली असल्यामुळे श्रद्धाचे वडील कडूबाळ चोपडे यांना राज्यपाल सी पी राधाकृष्णन,  मुख्यमंत्री देवेंद्र फडणवीस, उपमुख्यमंत्री अजित पवार यांच्या हस्ते शिवछत्रपती राज्य क्रीडा पुरस्कार २०२३-२४ देऊन गौरव करण्यात आला.

श्रद्धा चोपडे ही सध्या भोपाळ येथे साई क्रीडा प्रशिक्षण केंद्रात अर्जुन पुरस्कार प्राप्त यशपाल सोळंकी यांच्या मार्गदर्शनाखाली सराव करत आहे. श्रद्धा कडूबाळ चोपडे हिने या अगोदर २७ आंतरराष्ट्रीय स्पर्धा खेळून ३ सुवर्णपदक, ३ रौप्य पदक, ३ कांस्यपदक पटकावली आहेत. तसेच २७ राष्ट्रीय स्पर्धा खेळून १० सुवर्णपदक, ७ रौप्य पदक, २ कांस्यपदक मिळवले आहेत.  २०२५ मध्ये उत्तराखंड येथे झालेल्या नॅशनल गेम्स मध्ये श्रद्धा चोपडे हिने सुवर्णपदक जिंकले आहे.

श्रद्धा चोपडे हिला प्रशिक्षक यशपाल सोळंकी, मधुश्री देसाई, भीमराज रहाणे, अशोक जंगमे, कडूबाळ चोपडे यांचे मार्गदर्शन मिळत आहे. श्रीमती परमेश्वरी देवानी ज्युदो प्रशिक्षण केंद्र, बजाजनगर येथे श्रद्धाचे वडील कडूबाळ चोपडे व आई ज्योती चोपडे यांचा सर्व ज्युदो पदाधिकारी, प्रशिक्षक, पालक, खेळाडू यांच्या वतीने सत्कार करून अभिनंदन करण्यात आले. छत्रपती संभाजीनगर जिल्ह्यामध्ये ज्युदो खेळामध्ये मिळणारा आतापर्यंतच्या इतिहासातील हा पहिला पुरस्कार आहे. त्यामुळे ज्युदो खेळाडूंमध्ये आनंदाचे वातावरण आहे.

महाराष्ट्र ज्युदो संघटनेचे अध्यक्ष धनंजय भोसले, सचिव शैलेश टिळक, तांत्रिक समितीचे सचिव दत्ता आफळे, सतीश पहाडे, योगेश धाडवे, मधुश्री देसाई, गणेश शेटकर, विजय धिमान, जिल्हा संघटनेचे अध्यक्ष अजित मुळे सचिव अतुल बामणोदकर, भास्कर जाधव, भीमाशंकर नावंदे, विश्वजित भावे, विश्वास जोशी, प्रसन्न पटवर्धन, झिया अन्सारी, अमित साकला, सुनील सिरसवाल, दत्तू पवार, बजाजनगर व्यायाम व क्रीडा प्रसारक मंडळाचे अध्यक्ष नंदमुरी श्रीनिवास, मनोहर देवांनी, नामदेव दौंड, भीमराज रहाणे, अशोक जंगमे, अभिजित दळवी, शैलेश कावळे, सुधीर काटकर, सुप्रिया जंगमे, ऋतुजा सौदागर यांनी अभिनंदन करून शुभेच्छा दिल्या.