चेन्नई संघावर नऊ विकेटने विजय; रोहित शर्मा, सूर्यकुमार यादवची धमाकेदार फलंदाजी
मुंबई : रोहित शर्मा (नाबाद ७६) आणि सूर्यकुमार यादव (नाबाद ६८) यांच्या वादळी फलंदाजीच्या बळावर मुंबई इंडियन्स संघाने चेन्नई सुपर किंग्ज संघावर नऊ विकेट राखून दणदणीत विजय नोंदवला. या विजयाने मुंबईने पहिल्या सामन्यात चेन्नई संघाकडून झालेल्या पराभवाची परतफेड केली.
मुंबई संघासमोर विजयासाठी १७७ धावांचे लक्ष्य होते. या धावसंख्येचा पाठलाग करताना मुंबई इंडियन्स संघाने १५.४ षटकात एक बाद १७७ धावा फटकावत नऊ विकेट राखून दणदणीत विजय मिळवला. हा मुंबईचा चौथा विजय आहे.
रायन रिकेलटन व रोहित शर्मा या आक्रमक सलामी जोडीने धमाकेदार फलंदाजी करत ६३ धावांची भागीदारी केली. रिकेलटन १९ चेंडूत २४ धावा काढून बाद झाला. त्याने तीन चौकार व एक षटकार मारला. रवींद्र जडेजा याने सातव्या षटकात संघाला पहिले यश मिळवून दिले. त्यानंतर चेन्नई संघ विकेट मिळवू शकला नाही.
रोहित शर्मा व सूर्यकुमार यादव या आक्रमक फलंदाजांनी दुसऱ्या विकेटसाठी नाबाद ११४ धावांची दमदार भागीदारी करुन सामना एकतर्फी बनवला. रोहित शर्मा याने अवघ्या ४५ चेंडूत नाबाद ७६ धावांची वादळी खेळी केली. रोहितने चार चौकार व सहा उत्तुंग षटकार ठोकले. सूर्यकुमार यादव यानेही षटकार मारण्यात आपणही काही कमी नाही ते दाखवून देत पाच षटकार ठोकले. पाच षटकार व सहा चौकारांसह के‌वळ ३० चेंडूंचा सामना करत सूर्यकुमार याने नाबाद ६८ धावांची वादळी खेळी करत संघाला मोठा विजय मिळवून देण्यात मोलाचा वाटा उचलला.
जडेजा-दुबेची शानदार फलंदाजी
रवींद्र जडेजा आणि शिवम दुबे यांच्या अर्धशतकांच्या मदतीने चेन्नई सुपर किंग्ज संघाने मुंबई इंडियन्ससमोर १७७ धावांचे लक्ष्य ठेवले. या सामन्यात मुंबईने नाणेफेक जिंकून प्रथम गोलंदाजी करण्याचा निर्णय घेतला. सीएसकेने २० षटकांत पाच गडी गमावून १७६ धावा केल्या. जडेजाने ३५ चेंडूत चार चौकार आणि दोन षटकारांसह ५३ धावा काढत नाबाद राहिला. मुंबईकडून जसप्रीत बुमराहने दोन, तर दीपक चहर, अश्विनी कुमार आणि मिशेल सँटनर यांनी प्रत्येकी एक विकेट घेतली.
प्रथम फलंदाजी करताना, चेन्नई सुपर किंग्जची सुरुवात चांगली झाली नाही. त्यांनी रचिन रवींद्रची विकेट लवकर गमावली. रचिन नऊ चेंडूत पाच धावा करून बाद झाला. त्यानंतर, पहिला सामना खेळणाऱ्या आयुष म्हात्रेने शानदार फलंदाजी केली आणि पॉवर प्लेपर्यंत मुंबईला दुसरे यश मिळू दिले नाही. शेख रशीदने म्हात्रेला चांगली साथ दिली आणि सीएसकेचा धावसंख्या ५० च्या पुढे गेली. तथापि, चाहरने सीएसकेला त्यांचा दुसरा बळी मिळवून दिला. म्हात्रे १५ चेंडूत चार चौकार आणि दोन षटकारांसह ३२ धावा काढल्यानंतर बाद झाला.
त्यानंतर रशीदही २० चेंडूत १९ धावा काढून पॅव्हेलियनमध्ये परतला. सीएसकेचा डाव अडचणीत होता, पण शिवम दुबे आणि रवींद्र जडेजाने डावाची सूत्रे आपल्या हाती घेतली. या दोन्ही फलंदाजांनी चौथ्या विकेटसाठी ७९ धावांची भागीदारी केली आणि सीएसकेचा धावसंख्या १४० च्या पुढे नेला. यादरम्यान दुबेने ३० चेंडूत आपले अर्धशतक पूर्ण केले, परंतु ३२ चेंडूत दोन चौकार आणि चार षटकारांच्या मदतीने ५० धावा काढून तो बाद झाला. त्यानंतर धोनी आला जो चार धावा करून बाद झाला. शेवटी, जडेजाने शानदार फलंदाजी केली आणि आपले अर्धशतक पूर्ण केले. आयपीएलच्या १४ डावांनंतर जडेजाचे हे पहिले अर्धशतक होते. जडेजाच्या मदतीनेच सीएसकेने १७५ धावांचा टप्पा ओलांडला. जेमी ओव्हरटन याने तीन चेंडूत चौकारांसह नाबाद चार धावा काढल्या. बुमराह याने २५ धावांत दोन विकेट घेतल्या.
