छत्रपती संभाजीनगर ः जिल्हास्तरीय सब ज्युनियर वुशू स्पर्धेत शेख हम्माद याने सुवर्णपदक पटकावले. या कामगिरीमुळे शेख हम्माद याची पुणे येथे होणाऱया राष्ट्रीय वुशू स्पर्धेसाठी निवड झाली आहे.
विभागीय क्रीडा संकुलात इनडोअर हॉलमध्ये जिल्हास्तरीय सब ज्युनियर वुशू अजिंक्यपद स्पर्धा घेण्यात आली. या स्पर्धेत शेख हम्माद याने आपला दबदबा कायम ठेवत सुवर्णपदक जिंकले. या स्पर्धेत शेख हम्माद याने २२ किलो वजन गटात उपांत्य फेरीत अरहान याला पराभूत केले. त्यानंतर अंतिम फेरीत शेख हम्माद याने सौराज याला पराभूत करत सुवर्णपदक पटकावले.
या शानदार कामगिरीबद्दल जिल्हा वुशू संघटनेचे अध्यक्ष अंबादास दानवे व सचिव महेश इंदापुरे यांनी शेख हम्माद याच्या सुवर्ण कामगिरीचे कौतुक केले आहे. स्पर्धेचे आयोजक बंटी राठोड, सुमित खरात यांनी हम्माद याला शुभेच्छा दिल्या. शेख हम्माद हा अल फरहाद वेलफेअर अँड एज्युकेशन सोसायटी संचलित झेड एस वॉरियर्स अकॅडमी आझाद चौक येथे प्रशिक्षक सद्दाम सर व रिझवान सर यांच्याकडून प्रशिक्षण घेत आहे. झेड एस अकॅडमीचे अध्यक्ष सय्यद जहूर अली, अल फरहादचे अध्यक्ष वाजेद अली, सहसचिव फरहत समरीन यांनी शेख हम्माद याचे अभिनंदन केले व पुढील वाटचालीस शुभेच्छा दिल्या.
