मुंबई ः माजी केंद्रीय अर्थ राज्यमंत्री आनंदराव अडसूळ यांच्या चॅरिटेबल ट्रस्ट, सिबीईयु व आयडियल स्पोर्ट्स अकॅडमी यांच्या संयुक्त विद्यमाने महाराष्ट्र-कामगार दिनानिमित्त १ मेपासून सुरू होणाऱ्या विविध जिल्ह्यातील शालेय खेळाडूंच्या विनाशुल्क सांघिक सुपर लीग कॅरम स्पर्धेमधील १२ संघांची गटवारी जाहीर करण्यात आली आहे.
साखळी अ गटात आनंदराव अडसूळ प्लॅटीनम, एमडीसी ज्वेलर्स, दिलीप करंगुटकर स्ट्रायकर्स, ब गटात गोविंदराव मोहिते फायटर्स, कॅप्टन अभिजित चँम्पियन्स, आत्माराम मोरे प्रतिष्ठान; क गटात सिबिईयु वॉरीयर्स, घोषचा फेअर प्ले, राजन राणे ऑप्टीशीयन्स आणि ड गटात सुमती क्वीन, अविनाश नलावडे स्पोर्ट्स, सुरेश आचरेकर फिनिशर्स संघांचा समावेश आहे.
शालेय प्रतिष्ठेची डीएसओ कॅरम व बुद्धिबळ स्पर्धापर्यंत उपक्रमाचे सातत्य कायम राखण्यासाठी को-ऑप बँक एम्प्लॉईज युनियनचे अध्यक्ष आनंदराव अडसूळ व क्रीडा संघटक गोविंदराव मोहिते यांच्या मार्गदर्शनाखाली संयोजक लीलाधर चव्हाण व प्रमोद पार्टे प्रयत्नशील आहेत. त्याअनुषंगाने जास्तीत जास्त स्पर्धात्मक सामने दर्जेदार प्रतिस्पर्ध्यांविरुद्ध शालेय खेळाडूंना सुपर लीग सांघिक कॅरम स्पर्धेद्वारे उपलब्ध करण्यावर भर दिला जाणार आहे.
या स्पर्धेत पोद्दार अकॅडमी-मालाडचे प्रसन्न व पुष्कर गोळे, शिर्के हायस्कूल-रत्नागिरीच्या स्वरा मोहिरे व स्वरा कदम, न्यू इंग्लिश स्कूल-जैतापूरचा आर्यन राऊत, महात्मा गांधी विद्यालयाची तनया दळवी, अँटोनियो दासिल्व्हा हायस्कूलचा ध्रुव भालेराव, श्री नारायण गुरु हायस्कूल-चेंबूरचा उमैर पठाण, आयईएस सुळे गुरुजी शाळेची ग्रीष्मा धामणकर, आयएनजी इंग्लिश स्कूल-वसईचा श्रीशान पालवणकर, श्री महावीर जैन इंग्लिश स्कूल-कल्याणची संचिता मोहिते, शारदाश्रम विद्यामंदिरचा सोहम जाधव, पार्ले टिळक विद्यालयाचा सार्थक केरकर व अमेय जंगम, पाटकर विद्यालय-डोंबिवलीचे नील म्हात्रे, प्रसाद माने, देविका जोशी, सारा देवन आदी विविध जिल्ह्यामधील राष्ट्रीय ख्यातीच्या सबज्युनियर कॅरमपटूसह शालेय ३६ खेळाडूंचा कस लागणार आहे.
परिणामी १ ते ४ मे दरम्यान दररोज सकाळच्या सत्रात दादर-पश्चिम येथील को-ऑप.बँक एम्प्लॉईज युनियन सभागृहामध्ये ही स्पर्धा चुरशीची होईल. साखळी ४ गटवारीमधून प्रत्येक गटातून पहिले दोन संघ प्रीमियर सुपर लीगसाठी पात्र ठरणार आहेत. पूर्णपणे विनाशुल्क असलेल्या कॅरम उपक्रमात शालेय खेळाडूंचा चषक, प्रमाणपत्र, टी शर्ट व स्ट्रायकर आदी पुरस्कारांनी गौरव होणार आहे.
