नवी दिल्ली ः पाकिस्तानचा माजी कर्णधार बाबर आझमसह अनेक पाकिस्तानी क्रिकेटपटूंचे इंस्टाग्राम अकाउंट भारतात ब्लॉक करण्यात आले आहेत. जम्मू-काश्मीरमधील पहलगाम येथे झालेल्या दहशतवादी हल्ल्यानंतर ही कारवाई करण्यात आली आहे.
बाबर व्यतिरिक्त, ज्या पाकिस्तानी क्रिकेटपटूंचे इंस्टाग्राम अकाउंट ब्लॉक करण्यात आले आहेत त्यात शाहीन आफ्रिदी, हसन अली, इमाम उल हक आणि कर्णधार मोहम्मद रिझवान यांचा समावेश आहे.
भारताने कठोर पावले उचलली
पहलगाम हल्ल्यानंतर भारताने पाकिस्तानविरुद्ध अनेक कठोर पावले उचलली आहेत. भारताने अनेक पाकिस्तानी खेळाडू, क्रिकेटपटू आणि टीव्ही कलाकारांचे यूट्यूब चॅनेल आणि इंस्टाग्राम अकाउंट ब्लॉक केले आहेत. गुरुवारी, भारताने ऑलिंपिक चॅम्पियन भालाफेकपटू अर्शद नदीमचे इंस्टाग्राम अकाउंट देखील ब्लॉक केले होते आणि आता पाकिस्तानचे स्टार क्रिकेटपटू देखील चौकशीच्या भोवऱ्यात आले आहेत.
बाबर आणि रिझवानसह या क्रिकेटपटूंचे इंस्टाग्राम अकाउंट भारतात उघडण्याचा प्रयत्न करणाऱ्यांना ‘हे अकाउंट भारतात उपलब्ध नाही’ असा संदेश मिळत आहे. यासंदर्भातील कायदेशीर विनंतीनंतर हा निर्णय घेण्यात आला. कायदेशीर विनंतीवर क्लिक केल्यावर, ‘आम्हाला हे खाते बंद करण्याची कायदेशीर विनंती मिळाली आहे.’ आम्ही आमच्या धोरणांविरुद्ध त्याचा आढावा घेतला आणि कायदेशीर आणि मानवी हक्कांचे मूल्यांकन केले. “पुनरावलोकनानंतर, आम्ही स्थानिक कायद्याच्या विरुद्ध असलेल्या मजकुरावर प्रवेश प्रतिबंधित केला आहे.”
