नवी दिल्ली ः क्रिकेट जगतातून मोठी बातमी समोर आली आहे. अमेरिकेच्या संघाचा एकदिवसीय क्रिकेटचा दर्जा काढून घेण्यात आला आहे. अमेरिकेच्या महिला संघाने एकदिवसीय क्रिकेटचा दर्जा गमावल्यामुळे यूएई संघाला मोठा फायदा झाला आहे. आता युएई संघाला एकदिवसीय क्रिकेटचा दर्जा मिळाला आहे.
२०२५-२९ या कालावधीसाठी आयसीसीने एकदिवसीय दर्जा दिलेल्या १६ महिला संघांच्या यादीत युएई संघाचा समावेश झाला आहे, जो १२ मे पासून लागू होईल. या १६ संघांमध्ये पाच असोसिएट सदस्यांचा समावेश आहे – थायलंड, नेदरलँड्स, पापुआ न्यू गिनी म्हणजेच पीएनजी आणि स्कॉटलंड आणि युएई.
अमेरिकेची जागा युएईने घेतली
थायलंड, नेदरलँड्स, पापुआ न्यू गिनी आणि स्कॉटलंड यांनी त्यांचा दर्जा कायम ठेवला आहे तर युएईने अमेरिकेची जागा घेतली आहे. थायलंड आणि स्कॉटलंडने नुकत्याच झालेल्या महिला एकदिवसीय विश्वचषक पात्रता फेरीत प्रवेश मिळवून त्यांचा एकदिवसीय दर्जा मिळवला, तर पीएनजी आणि नेदरलँड्सने त्यांच्या टी२० क्रमवारीच्या आधारे त्यांचा दर्जा कायम ठेवला. टी २० क्रमवारीत पीएनजी १३ व्या स्थानावर आहे आणि नेदरलँड्स १५ व्या स्थानावर आहे. थायलंड आणि स्कॉटलंड हे टी २० क्रमवारीत अनुक्रमे ११ व्या आणि १२ व्या स्थानावर आहेत. वार्षिक रँकिंग अपडेटच्या वेळी, युएईने टी २० क्रमवारीत १६ व्या स्थानावर राहून, पुढील सर्वोच्च क्रमांकाचा असोसिएट संघ म्हणून त्यांचा एकदिवसीय दर्जा मिळवला. एकदिवसीय दर्जा असलेल्या संघांना क्रमवारी गाठण्यासाठी किंवा ती कायम ठेवण्यासाठी तीन ते चार वर्षांच्या कालावधीत किमान आठ एकदिवसीय सामने खेळावे लागतील.
पाकिस्तानमध्ये खेळल्या गेलेल्या विश्वचषक पात्रता फेरीत स्कॉटलंडने वेस्ट इंडिज आणि थायलंडला हरवून सहा संघांपैकी चौथे स्थान मिळवले, तर थायलंडने त्यांचे पाचही सामने गमावल्यानंतर शेवटचे स्थान मिळवले. या स्पर्धेद्वारे पाकिस्तान आणि बांगलादेश संघाने विश्वचषक स्पर्धेची तिकिटे मिळवली, जी या वर्षाच्या अखेरीस भारत आयोजित करेल. तथापि, पाकिस्तान संघ विश्वचषकात सहभागी होण्यासाठी भारतात येणार नाही. पाकिस्तान आपले सामने तटस्थ ठिकाणी खेळू शकतो.
टी २० क्रमवारीत ऑस्ट्रेलियाचे वर्चस्व
ऑस्ट्रेलिया २९९ रेटिंग गुणांसह टी २० क्रमवारीत अव्वल स्थानावर आहे, तर इंग्लंड (२७९ रेटिंग) दुसऱ्या स्थानावर आहे. भारतीय महिला क्रिकेट संघ तिसऱ्या क्रमांकावर आहे. टीम इंडियाचे २६० रेटिंग गुण आहेत. अमेरिकेचा महिला संघ सध्या झिम्बाब्वेविरुद्ध मालिका खेळत आहे. दरम्यान, यूएई संघ सध्या बँकॉकमध्ये आहे. ती यजमान थायलंड, हाँगकाँग आणि कुवेत विरुद्धच्या टी २० मालिकेत भाग घेत आहे.
