प्रोफेशनल ट्रॉफी अंडर १४ क्रिकेट ः स्वरित दरकचे तुफानी शतक, श्रीरंग कुलकर्णीचे पाच बळी
छत्रपती संभाजीनगर ः प्रोफेशनल क्रिकेट ट्रॉफी अंडर १४ क्रिकेट स्पर्धेत सीके स्पोर्ट्स संघाने वायएल क्रिकेट अकादमी संघाचा ११० धावांनी पराभव केला. या सामन्यात आक्रमक शतक साजरे करणारा स्वरित दरक याने सामनावीर पुरस्कार मिळवला.
प्रोफेशनल क्रिकेट अकादमी९९चे मुख्य संचालक व प्रशिक्षक आदित्य नाईक यांनी या स्पर्धेचे आयोजन पडेगाव येथील अविनाश साळवी फाऊंडेशन क्रिकेट मैदानावर केले आहे. सीके स्पोर्ट्स संघाने नाणेफेक जिंकून प्रथम फलंदाजी स्वीकारत २५ षटकात आठ बाद २३१ अशी भक्कम धावसंख्या उभारुन सामन्यावर वर्चस्व गाजवले. या धावसंख्येचा पाठलाग करताना वायएल क्रिकेट अकादमी संघ १५.२ षटकात अवघ्या १२१ धावांत सर्वबाद झाला. सीके स्पोर्ट्स संघाने तब्बल ११० धावांनी सामना जिंकून आगेकूच केली.
या सामन्यात स्वरित दरक याने तुफानी फलंदाजी केली. त्याने अवघ्या ५८ चेंडूंत १०५ धावांची जलद शतकी खेळी करत मैदान गाजवले. शतकी खेळी करताना त्याने १४ चौकार व पाच उत्तुंग षटकार मारले. रणवीर लोंढे याने १८ चेंडूत ४६ धावांची जलद खेळी साकारली. त्याने पाच टोलेजंग षटकार ठोकताना चार चौकार देखील मारले. वेद महाजन याने दोन चौकारांसह २४ धावांचे योगदान दिले.
गोलंदाजीत श्रीरंग कुलकर्णी याने प्रभावी गोलंदाजी करत ३१ धावांत पाच विकेट घेऊन सामना गाजवला. अभिषेक कुचेकर याने १४ धावांत दोन गडी बाद केले. राजवीर याने २३ धावांत दोन बळी घेतले.
संक्षिप्त धावफलक ः सीके स्पोर्ट्स ः २५ षटकात आठ बाद २३१ (स्वरित दरक १०५, कृतार्थ पाडळकर १९, स्वराज झिनजन पाटील १४, वेद महाजन २४, श्लोक कायल १६, आनंद भोपळे नाबाद १०, इतर ३८, राजवीर २-२३, रणवीर लोंढे १-३९, अंश १-१२, जिने १-३३) विजयी विरुद्ध वायएल क्रिकेट अकादमी ः १५.२ षटकात सर्वबाद १२१ (राजवीर ९, आदित्य २२, रणवीर लोंढे ४६, इतर ३५, श्रीरंग कुलकर्णी ५-३१, अभिषेक कुचेकर २-१४, स्वराज झिनजन पाटील १-४). सामनावीर ः स्वरित दरक.
