प्रोफेशनल ट्रॉफी अंडर १४ क्रिकेट ः रणवीर लोंढे सामनावीर
छत्रपती संभाजीनगर ः प्रोफेशनल क्रिकेट ट्रॉफी अंडर १४ क्रिकेट स्पर्धेत वायएल क्रिकेट अकादमी संघाने पीसीए९९ क संघावर ५६ धावांनी विजय नोंदवला. या सामन्यात रणवीर लोंढे याने ९१ धावांची वादळी खेळी करत सामनावीर पुरस्कार पटकावला.
पडेगाव येथील अविनाश साळवी फाऊंडेशन क्रिकेट मैदानावर ही स्पर्धा होत आहे. अंडर १४ क्रिकेटपटूंना व्यापक खेळण्याची संधी मिळावी या हेतूने प्रोफेशनल क्रिकेट ट्रॉफीचे आयोजन करण्यात आले असल्याचे प्रोफेशनल क्रिकेट अकादमीचे मुख्य संचालक व प्रशिक्षक आदित्य नाईक यांनी सांगितले. या सामन्यात वाय एल क्रिकेट अकादमी संघाने नाणेफेक जिंकून प्रथम फलंदाजी स्वीकारली व २५ षटकात नऊ बाद २०५ अशी भक्कम धावसंख्या उभारली. या धावसंख्येच्या प्रत्युत्तरात पीसीए९९ क संघ २५ षटकात आठ बाद १४९ धावा काढू शकला. वायएल अकादमीने ५६ धावांनी सामना जिंकला.
या सामन्यात रणवीर लोंढे याने ९१ धावांची धमाकेदार खेळी केली. रणवीर याने ५५ चेंडूंचा सामना करत चार चौकार व तब्बल १० उत्तुंग षटकार मारले. आर्यन राठोड याने ३७ चेंडूत ४७ धावा फटकावल्या. आर्यनने सात चौकार मारले. कुणाल याने २९ चेंडूत २८ धावांचे योगदान दिले. त्याने दोन चौकार व एक षटकार मारला.
गोलंदाजीत कुणाल याने २८ धावांत तीन विकेट घेऊन अष्टपैलू कामगिरी बजावली. अंश याने १५ धावांत दोन गडी बाद केले. शौर्य राजपूत याने २६ धावांत दोन बळी टिपले.
संक्षिप्त धावफलक
वायएल क्रिकेट अकादमी ः २५ षटकात नऊ बाद २०५ (अर्णव वाघोले ९, आदित्य ८, कुणाल २८, रणवीर लोंढे ९१, पियुष ७, इतर ४७, शौर्य राजपूत २-२६, हुजैफा पठाण २-४६, देवेंद्र २-२२, युग १-४) विजयी विरुद्ध पीसीए९९ क संघ ः २५ षटकात आठ बाद १४९ (रुद्र शहाणे १२, आर्यन राठोड ४७, अर्णव जोशी १८, करक भारद्वाज १९, इतर ३१, कुणाल ३-२८, अंश २-१५, जेनी १-१४, रणवीर लोंढे १-३१, नैतिक १-९). सामनावीर ः रणवीर लोंढे.
