प्रोफेशनल ट्रॉफी अंडर १४ क्रिकेट – झैद खान सामनावीर
छत्रपती संभाजीनगर ः प्रोफेशनल क्रिकेट ट्रॉफी अंडर १४ क्रिकेट स्पर्धेत पीसीए९९ ब टीम आणि एएसएफ यांच्यातील रोमहर्षक सामना टाय झाला. या रंगतदार सामन्यात झैद खान याने सामनावीर पुरस्कार संपादन केला.
पडेगाव येथील अविनाश साळवी फाऊंडेशन क्रिकेट मैदानावर ही स्पर्धा होत आहे. अंडर १४ क्रिकेटपटूंना व्यापक खेळण्याची संधी मिळावी या हेतूने प्रोफेशनल क्रिकेट ट्रॉफीचे आयोजन करण्यात आले असल्याचे प्रोफेशनल क्रिकेट अकादमीचे मुख्य संचालक व प्रशिक्षक आदित्य नाईक यांनी सांगितले. या सामन्यात पीसीए९९ ब संघाने प्रथम फलंदाजी करताना २३.३ षटकात सर्वबाद १४३ धावसंख्या उभारली. एएसएफ संघाने १९ षटकात सर्वबाद १४३ धावा काढल्या. अतिशय रोमांचक सामना टाय झाला. टाय झालेला हा या स्पर्धेतील पहिला सामना आहे.
या सामन्यात प्रणव कदम याने ४० चेंडूंत ५५ धावांची धमाकेदार खेळी केली. प्रणवने आठ चौकार व दोन उत्तुंग षटकार मारले. कार्तिक गेहलोत याने ३५ चेंडूत ४५ धावांची जलद खेळी साकारली. त्याने चार टोलेजंग षटकार व चार षटकार ठोकत सामना गाजवला. झैद खान याने २८ चेंडूत ४१ धावांचे योगदान दिले. त्याने सात चौकार मारले.
गोलंदाजीत आदित्य आढाव याने ११ धावांत तीन विकेट घेऊन आपला ठसा उमटवला. झैद खान याने २४ धावांत तीन बळी घेत अष्टपैलू कामगिरी बजावली. सोहम हारके याने २६ धावांत तीन गडी टिपले.
संक्षिप्त धावफलक
पीसीए९९ ब टीम ः २३.३ षटकात सर्वबाद १४३ (ज्योतिरादित्य राजगुरू ६, अनिश शिंदे १६, प्रणव कदम ५५, प्रतीक कदम १२, कार्तिक भारद्वाज १२, इतर ३२, आदित्य आढाव ३-११, झैद खान ३-२४, नूर सय्यद २-२८, काव्या सांगळे १-३१, विष्णू कुर्रा १-१६) टाय विरुद्ध एएसएफ टीम ः १९ षटकात सर्वबाद १४३ (कार्तिक गेहलोत ४५, प्रत्युष उघाडे ८, झैद खान ४१, श्लोक देशमुख १९, इतर १९, कार्तिक भारद्वाज ३-३०, सोहम हारके ३-२६, प्रज्ज्वल तिलकरी १-३०, विकी भोसले १-२३). सामनावीर ः झैद खान.
