प्रोफेशनल ट्रॉफी अंडर १४ क्रिकेट – नूर सय्यद सामनावीर
छत्रपती संभाजीनगर ः प्रोफेशनल क्रिकेट ट्रॉफी अंडर १४ क्रिकेट स्पर्धेत एएसएफ संघाने वायएल क्रिकेट अकादमी संघावर नऊ विकेट राखून मोठा विजय संपादन केला. या सामन्यात नूर सय्यद याने सामनावीर पुरस्कार संपादन केला.
पडेगाव येथील अविनाश साळवी फाऊंडेशन क्रिकेट मैदानावर ही स्पर्धा होत आहे. अंडर १४ क्रिकेटपटूंना व्यापक खेळण्याची संधी मिळावी या हेतूने प्रोफेशनल क्रिकेट ट्रॉफीचे आयोजन करण्यात आले असल्याचे प्रोफेशनल क्रिकेट अकादमीचे मुख्य संचालक व प्रशिक्षक आदित्य नाईक यांनी सांगितले. या सामन्यात वाय एल क्रिकेट अकादमी संघाने नाणेफेक जिंकून प्रथम फलंदाजी स्वीकारत १९ षटकात सर्वबाद ११७ असे माफक लक्ष्य उभे केले. या धावसंख्येचा पाठलाग करताना एएसएफ संघाने १३ षटकात एक बाद ११८ धावा फटकावत नऊ विकेट राखून दणदणीत विजय साकारला.
या सामन्यात कार्तिक गेहलोत याने आक्रमक फलंदाजी करत अर्धशतक साजरे केले. कार्तिक याने ३३ चेंडूंचा सामना करत ५४ धावा फटकावल्या. त्याने ७ चौकार व ३ षटकार मारले. झैद खान याने ३६ चेंडूत ३७ धावांची वेगवान खेळी केली. त्याने ७ चौकार मारले. कुणाल याने २१ चेंडूत २८ धावांचे योगदान दिले. त्याने पाच चौकार मारले.
गोलंदाजीत नूर सय्यद याने अचूक व प्रभावी मारा करत ४ षटकात केवळ ६ धावांच्या मोबदल्यात ३ विकेट घेतल्या. विष्णू कुर्रा याने ३२ धावांत तीन बळी घेतले. आदित्य आढाव याने ३३ धावांत तीन गडी बाद केले.
संक्षिप्त धावफलक
वायएल क्रिकेट अकादमी ः १९ षटकात सर्वबाद ११७ (अर्णव वाघोळे २२, राजवीर १८, कुणाल १८, आदिल ९, इतर २८, नूर सय्यद ३-६, आदित्य आढाव ३-३३, विष्णू कुर्रा ३-३२, झैद खान १-१७) पराभूत विरुद्ध एएसएफ टीम ः १३ षटकात एक बाद ११८ (कार्तिक गेहलोत निवृत्त ५४, झैद खान नाबाद ३७, असद युनूस सय्यद नाबाद ६, अंश १-१७, इतर २१). सामनावीर ः नूर सय्यद.
