सोलापूर ः सोलापूर जिल्ह्यात पायाभूत क्रिकेट सुविधा वाढवण्यासाठी महाराष्ट्र क्रिकेट संघटना सर्वोतोपरी प्रयत्न करणार असल्याचे महाराष्ट्र क्रिकेट संघटनेचे अध्यक्ष रोहित पवार यांनी येथे बुधवारी सांगितले.
सोलापूर येथील आयएमए हॉलमध्ये महाराष्ट्र क्रिकेट असोसिएशन व सोलापूर जिल्हा क्रिकेट असोसिएशन यांच्या संयुक्त विद्यमाने पत्रकार परिषदेचे आयोजन करण्यात आले होते. येत्या जून महिन्याच्या सुरुवातीला पुण्यातील महाराष्ट्र क्रिकेट असोसिएशनच्या आंतरराष्ट्रीय स्टेडियमवर महाराष्ट्र प्रीमियर लीग व वुमेन्स महाराष्ट्र प्रीमियर लीग या स्पर्धांचा थरार रंगणार आहे. डब्ल्यूएमपीएलच्या पहिल्या हंगामात सोलापूर स्मॅशर्स या संघाचाही समावेश असणार आहे. या संघाची टी २० स्पर्धेमागची भूमिका, नवोदित खेळाडूंना मिळणारी संधी, संघमालकांची भूमिका, सोलापूर जिल्हा क्रिकेट असोसिएशन करत असलेले काम, राज्यामध्ये क्रिकेटच्या पायाभूत सुविधा निर्माण करण्यासाठी होत असलेले प्रयत्न या विषयांवर ही पत्रकार परिषद घेण्यात आली. महाराष्ट्र क्रिकेट असोसिएशनचे अध्यक्ष रोहित दादा पवार यांनी यावेळी पत्रकारांशी संवाद साधला.
महाराष्ट्र प्रीमियर लीगमुळे महाराष्ट्राच्या कानाकोपऱ्यातील सर्वसामान्य कुटुंबातील अनेक नवोदित खेळाडूंना योग्य वेळी संधी मिळत आहे. या स्पर्धेमुळे त्यांच्यासाठी भविष्यातील अनेक दरवाजे उघडले आहेत. महाराष्ट्र क्रिकेट संघटनेतर्फे (एमसीए) राज्यातील प्रत्येक जिल्ह्याला क्रिकेटच्या पायाभूत सुविधांच्या विकासासाठी प्रत्येकी ७५ लाख रुपयांचे अनुदान दिले जाणार आहे. सोलापूर जिल्ह्यात पायाभूत सुविधांचा विकास करण्यासाठी, अनेक नवीन प्रतिभान खेळाडू निर्माण करण्यासाठी एमसीए सर्वोतोपरी प्रयत्न करत आहे. महाराष्ट्रातील सर्वच जिल्ह्यात क्रिकेट सुविधांचा विकास करून महाराष्ट्र क्रिकेटला एका वेगळ्या उंचीवर नेण्यासाठी एमसीए सदैव कटिबद्ध असल्याचे संघटनेचे अध्यक्ष आमदार रोहित पवार यांनी सांगितले.
या प्रसंगी महाराष्ट्र क्रिकेट असोसिएशनचे सचिव अॅड. कमलेश पिसाळ, अपेक्स कौन्सिल सदस्य सुनील मुथा, विनायक द्रविड, सुशील शेवाळे, मुख्य कार्यकारी अधिकारी अजिंक्य जोशी, सोलापूर जिल्हा क्रिकेट असोसिएशनचे अध्यक्ष दिलीप माने, व्हाईस चेअरमन श्रीकांत मोरे, सचिव चंद्रकांत रेंबुर्स, उपाध्यक्ष प्रकाश भुतडा, माजी अध्यक्ष दत्ता सुरवसे, सोलापूर स्मॅशर्स संघाचे प्रतिनिधी शुभम बागुल, सीईओ किरण आढाव, मेंटर रोहित जाधव, मॅनेजर मनीषा कोल्हटकर, तसेच भारतीय महिला संघाची खेळाडू तेजल हसबनीस, आयकॉन खेळाडू ईश्वरी अवसारे, सपोर्ट स्टाफ तसेच जिल्हा संघटनेचे इतर पदाधिकारी व कर्मचारी उपस्थित होते.
यावेळी एमसीए अध्यक्ष रोहित पवार म्हणाले की, ‘महाराष्ट्र प्रीमियर लीग या स्पर्धेमुळे राज्याच्या कानाकोपऱ्यात असलेल्या गुणवान क्रिकेटपटूंना राष्ट्रीय स्तरावर येण्यासाठी संधी मिळणार असून या स्पर्धेमुळे भविष्यात भारताला देखील गुणवान क्रिकेटपटू मिळणार आहेत. सलग तिसऱ्या वर्षी खेळविल्या जाणाऱ्या या स्पर्धेच्या यशात सर्व संघांच्या मालकांचा मोलाचा वाटा आहे. एमपीएल व डब्ल्यूएमपीएल हे केवळ स्पर्धात्मक मंच नसून, एक परिवार आहे. सर्व संघमालक, खेळाडू, पदाधिकारी, टेक्निकल टीम आणि सपोर्ट स्टाफ यांचे परिश्रम या यशामागे आहेत.
सोलापूर जिल्हा क्रिकेट असोसिएशन अध्यक्ष दिलीप माने व चेअरमन रणजीतसिंह मोहिते पाटील यांच्या नेतृत्वाखाली त्यांची सर्व कमिटी सोलापूर क्रिकेटच्या विकासासाठी उत्तम प्रयत्न करत आहेत, या गोष्टीचा मनस्वी आनंद आहे. महाराष्ट्र क्रिकेट असोसिएशनच्या साथीने सोलापूर जिल्ह्यातील पायाभूत सुविधांचा विकास करण्यासाठी आम्ही सक्रियपणे काम करत आहोत व भविष्यात आपल्याला सकारात्मक बदल झालेले दिसतील, हा आम्हाला विश्वास आहे. आज सोलापूर मधील अनेक महिला व पुरुष खेळाडू विविध वयोगटांसाठी महाराष्ट्र संघाचे प्रतिनिधित्व करीत आहेत. आमचा दृढ विश्वास आहे की येत्या काळात एमपीएल व डब्ल्यूएमपीएलच्या माध्यमातून सोलापूर जिल्ह्यातील अधिकाधिक खेळाडू महाराष्ट्राकडून व पुढे जाऊन देशासाठी खेळतील.”
महाराष्ट्र क्रिकेट संघटना आगामी हंगामात राष्ट्रीय क्रिकेट अकादमीच्या धर्तीवर स्वतःची अकादमी सुरु करणार असून ही अकादमी अजय शिर्के यांच्या नावाने पुण्यातच सुरू करण्यात येईल. त्यानंतर महाराष्ट्रात चार विभागीय अकादमी सुरू करण्यात येणार आहे. त्यातील एक विभागीय अकादमी सोलापूर येथे सुरू होणार असून यामुळे सोलापूर व लगतच्या जिल्ह्यांमध्ये क्रिकेटचा दर्जा उंचावण्यासाठी मदत होणार आहे.
या वर्षीच्या महाराष्ट्र प्रीमियर लीग व वुमन्स महाराष्ट्र प्रीमियर लीग लिलावासाठी एकूण ४०९ पुरुष खेळाडू आणि २४९ महिला खेळाडू नोंदणीकृत होते. त्यामधून संघ मालकांनी आपापल्या संघांचा बॅलन्स व गरजांनुसार संघासाठी खेळाडूंची निवड केली. या हंगामात एमपीएल मध्ये ६ संघ आणि डब्लूएमपीएल मध्ये ४ संघ सहभागी झाले असून, ही स्पर्धा येत्या मे व जून २०२५ मध्ये एमसीए गहुंजे इंटरनॅशनल स्टेडियम, पुणे येथे खेळविण्यात येणार आहे.
