जिनिव्हामध्ये कारकिर्दीतील १०० वे एकेरी विजेतेपद जिंकले
जिनेव्हा ः नोवाक जोकोविच याने अखेर त्याच्या कारकिर्दीतील १०० वे एकेरी विजेतेपद जिंकले आहे. जिनेव्हा ओपनच्या अंतिम फेरीत त्याने ह्युबर्ट हुर्काझचा ५-७, ७-६, ७-६ असा पराभव करून जेतेपदांचे शतक पूर्ण केले. असे करणारा तो जगातील फक्त तिसरा टेनिसपटू ठरला. जोकोविच गेल्या काही काळापासून त्याच्या १०० व्या एकेरी जेतेपदासाठी झुंजत आहे. मात्र, त्याला यश मिळत नव्हते.
नऊ महिन्यांपूर्वी पॅरिस ऑलिंपिकमध्ये जोकोविचने त्याच्या कारकिर्दीतील ९९ वे एकेरी विजेतेपद जिंकले. तेव्हापासून तो शांघाय मास्टर्स आणि मियामी मास्टर्समध्ये दोन अंतिम फेरीत पराभूत झाला आहे. त्याच्या ३८ व्या वाढदिवसाच्या दोन दिवसांनंतर, त्याला १०० वे विजेतेपद जिंकण्यासाठी तीन तासांची कठोर मेहनत लागली. विजयानंतर जोकोविच म्हणाला, ‘येथे माझे १०० वे विजेतेपद जिंकल्याचा मला आनंद आहे. यासाठी मला खूप कष्ट करावे लागले.
२४ ग्रँड स्लॅम जिंकणाऱ्या जोकोविचपेक्षा जिमी कॉनर्स (१०९) आणि रॉजर फेडरर (१०३) यांच्याकडे एकेरी जेतेपदे जास्त आहेत. आता तो त्या दोघांच्याही विक्रमांवर लक्ष केंद्रित करेल.
सर्वाधिक ग्रँड स्लॅम सामने खेळलेला खेळाडू
या वर्षाच्या सुरुवातीला, जोकोविच ओपन युगात सर्वाधिक ग्रँड स्लॅम सामने खेळणारा खेळाडू बनला होता. त्याने ऑस्ट्रेलियन ओपन दरम्यान त्याचा ४३० वा ग्रँड स्लॅम सामना खेळला आणि कारकिर्दीत ४२९ ग्रँड स्लॅम सामने खेळणाऱ्या फेडररला मागे टाकण्यात यश मिळवले.
सर्वाधिक ग्रँड स्लॅम जेतेपदे जिंकण्याचा विक्रम
जोकोविच याच्या नावावर सर्वाधिक ग्रँड स्लॅम एकेरी जेतेपदांचा विक्रम (२४) आहे. पुरुषांमध्ये तो राफेल नदाल (२२) आणि फेडरर (२०) यांच्या पुढे आहे. ३७ वर्षीय खेळाडूने सर्वाधिक काळ रँकिंगमध्ये अव्वल स्थानावर राहण्याचा विक्रम केला आहे. त्याने त्याच्या कारकिर्दीत आतापर्यंत ३७ ग्रँड स्लॅम फायनल खेळल्या आहेत, जे फेडररपेक्षा सहा जास्त आहेत.
