एकाच संघाकडून खेळताना नऊ हजार धावा फटकावणारा पहिला फलंदाज
लखनौ ः अनुभवी आक्रमक फलंदाज विराट कोहली याने आयपीएल स्पर्धेत एक नवा इतिहास रचला आहे. कोहली याने टी २० क्रिकेटमध्ये ९००० धावांचा टप्पा गाठला आहे. अशी कामगिरी करणारा विराट कोहली हा पहिला फलंदाज ठरला असून त्याने डेव्हिड वॉर्नर याला मागे टाकले आहे.
रॉयल चॅलेंजर्स बंगळुरू संघाचा माजी कर्णधार विराट कोहली याने मंगळवारी लखनौ सुपर जायंट्स संघाविरुद्ध शानदार फलंदाजी करत मोठी कामगिरी केली. टी २० क्रिकेटमध्ये एकाच संघाकडून खेळताना ९००० धावांचा टप्पा गाठणारा तो पहिला फलंदाज ठरला आहे.
कोहलीने रचला इतिहास
किंग कोहलीने या सामन्यात २४ धावा काढताच टी २० क्रिकेटमध्ये ९००४ धावा केल्या. कोहलीने २००८ मध्ये आरसीबी सोबत आयपीएल कारकिर्दीला सुरुवात केली, तेव्हापासून कोहली या संघाचा भाग आहे. लखनौच्या एकाना स्टेडियमवर त्याच्या बॅटने जोरदार गर्जना केली आणि तो ९००० धावांचा टप्पा गाठणारा पहिला फलंदाज ठरला. लखनौ विरुद्ध, त्याने २७ चेंडूत हंगामातील आठवे अर्धशतक झळकावले. १० चौकारांच्या मदतीने ३० चेंडूत ५४ धावा काढल्यानंतर तो बाद झाला.
सर्वाधिक अर्धशतक करणारा फलंदाज
यासह विराट कोहली आयपीएल स्पर्धेत सर्वाधिक अर्धशतके करणारा फलंदाज देखील बनला आहे. लखनौविरुद्ध अर्धशतक झळकावताच त्याने या बाबतीत डेव्हिड वॉर्नरला मागे टाकले. यापूर्वी कोहली आणि वॉर्नर संयुक्तपणे अव्वल स्थानावर होते. या दोन्ही फलंदाजांच्या नावावर आयपीएलमध्ये ६२ अर्धशतके झळकावण्याचा विक्रम होता. तथापि, आता कोहलीच्या नावावर ६३ अर्धशतके आहेत. रोहित शर्मा तिसऱ्या स्थानावर आहे ज्याने आयपीएलमध्ये ४६ अर्धशतके झळकावली आहेत. एका हंगामात सर्वाधिक अर्धशतक खेळण्याच्या बाबतीत कोहलीचा हा तिसरा यशस्वी हंगाम आहे. त्याने २०१६ मध्ये ११ आणि २०२३ मध्ये आठ अर्धशतके ठोकली.
टी २० मध्ये एकाच संघासाठी सर्वाधिक धावा करणारे फलंदाज
विराट कोहली ९००४ (आरसीबी)
रोहित शर्मा ६०६० (मुंबई इंडियन्स)
जेम्स विन्स ५९३४ (हॅम्पशायर)
सुरेश रैना ५५२८ (चेन्नई सुपर किंग्ज)
एमएस धोनी ५३१४ (चेन्नई सुपर किंग्ज)
