पॅरिस ः सर्बियाच्या नोवाक जोकोविचने वर्षातील दुसऱ्या ग्रँड स्लॅम फ्रेंच ओपनच्या पहिल्या फेरीत एकतर्फी विजय मिळवला आणि या स्पर्धेच्या पहिल्या फेरीत अपराजित राहण्याचा विक्रम कायम ठेवला. सहाव्या मानांकित नोवाक जोकोविचने त्याच्या २५ व्या ग्रँड स्लॅमच्या मार्गावर विजयी मोहीम सुरू केली आहे. तीन वेळा फ्रेंच ओपन विजेता जोकोविचने अमेरिकेच्या मॅकेन्झी मॅकडोनाल्डचा ६-३, ६-३, ६-३ असा पराभव केला.
अलीकडेच टूर स्तरावर १०० वे जेतेपद जिंकणाऱ्या जोकोविचने रोलँड गॅरोसच्या पहिल्या फेरीत आपला विजयाचा विक्रम २०-० असा केला आहे. २०१० पासून जोकोविचने फ्रेंच ओपनच्या पहिल्या फेरीत कधीही एकही सेट गमावलेला नाही आणि सलग विजय नोंदवले आहेत. त्याच वेळी, डोपिंग बंदी पूर्ण केल्यानंतर पहिला ग्रँड स्लॅम खेळणाऱ्या इटलीच्या अव्वल मानांकित यानिक सिनरने फ्रेंच ओपन टेनिस स्पर्धेत विजयी सुरुवात केली. त्याने पहिल्या फेरीत फ्रान्सच्या आर्थर रिडरक्नेच्टचा ६-४, ६-३, ७-५ असा सरळ सेटमध्ये पराभव केला. ग्रँड स्लॅममधील हा त्याचा सलग १५ वा विजय आहे. सिनरने यूएस ओपन आणि ऑस्ट्रेलियन ओपनच्या स्वरूपात शेवटचे दोन ग्रँड स्लॅम जिंकले आहेत.
तीन महिन्यांच्या डोपिंग बंदी पूर्ण केल्यानंतर सिनरची ही दुसरी स्पर्धा आहे. यापूर्वी, तो इटालियन ओपनमध्ये खेळला होता, जिथे तो कार्लोस अल्काराझकडून पराभूत झाला होता. सिनरने आतापर्यंत तीन ग्रँड स्लॅम जिंकले आहेत. गेल्या वर्षी फ्रेंच ओपनमध्ये तो उपांत्य फेरीत पोहोचला होता. पुढच्या फेरीत तो फ्रान्सच्या रिचर्ड गास्केटविरुद्ध खेळेल. त्याच वेळी, गतविजेता आणि जर्मनीच्या तिसऱ्या मानांकित अलेक्झांडर झ्वेरेव्हने अमेरिकेच्या लर्नर टिएनचा ६-३, ६-३, ६-४ असा पराभव केला. सर्वात मोठा अपसेट रशियाच्या ११ व्या मानांकित डॅनिल मेदवेदेवच्या रूपात आला. इंग्लंडच्या कॅमेरॉन नॉरीने त्याला ७-५, ६-३, ४-६, १-६, ७-५ असा पराभव केला.
दिमित्रोव्हने सामना मध्यंतरी सोडला
रशियाच्या मेदवेदेवने नॉरीविरुद्ध ३-१ अशी आघाडी घेतली, परंतु त्यानंतर त्याने सलग आठ गेम गमावले आणि दोन सेट गमावले. त्यानंतर त्याने पुनरागमन केले आणि दोन सेट जिंकून सामना बरोबरीत आणला. पाचव्या सेटमध्येही त्याने २-१ अशी आघाडी घेतली, परंतु नोरीने सामना जिंकला. मेदवेदेववर नोरीचा हा पहिलाच विजय आहे. बल्गेरियाचा ग्रिगोर दिमित्रोव्ह देखील बाहेर पडला. पहिले दोन सेट ६-२, ६-३ असा जिंकल्यानंतर तिसरा सेट २-६ असा गमावल्याने त्याला अमेरिकेच्या इथन क्विनविरुद्ध सामना सोडावा लागला.
अमेरिकेच्या गॉफने गॅडेकीचा पराभव केला
महिला गटात अमेरिकेच्या दुसऱ्या मानांकित कोको गॉफनेही विजयाने सुरुवात केली आहे. तिने ऑस्ट्रेलियाच्या ऑलिव्हिया गॅडेकीचा ६-२, ६-२ असा पराभव केला. फ्रेंच ओपनच्या अंतिम फेरीत पोहोचलेली गॉफ जेव्हा कोर्टवर आली तेव्हा तिच्या बॅगेत रॅकेट नव्हते. तिने तिचे रॅकेट चेंजिंग रूममध्ये सोडले होते. त्यामुळे सामना काही काळासाठी थांबवण्यात आला.
राफाच्या नावाची जर्सी ४२ हजारांना विकली
फ्रेंच ओपनमध्ये राफेल नदालचा सन्मान झाल्यानंतर एका दिवसानंतर, डझनभर प्रेक्षकांनी सत्कार समारंभात वाटण्यात आलेले ‘मर्सी राफा’ टी-शर्ट विकण्यास सुरुवात केली. अनेक मोफत टी-शर्टची किंमत ५०० युरो (सुमारे ४२ हजार रुपये) पर्यंत पोहोचली. २५-५-२०२५ या तारखेव्यतिरिक्त, थँक यू राफासह, टी-शर्टवर आरजी १४ लिहिलेले होते, जे नदालने रोलँड गॅरोसमध्ये जिंकलेल्या १४ विजेतेपदांचे संकेत देत होते.
