आशियाई अॅथलेटिक्स चॅम्पियनशिप
गुमी (दक्षिण कोरिया) ः आशियाई अॅथलेटिक्स चॅम्पियनशिप स्पर्धेत भारताच्या गुलवीर सिंगने पुरुषांच्या १०,००० मीटर शर्यतीत चमकदार कामगिरी करून देशाला स्पर्धेतील पहिले सुवर्णपदक मिळवून दिले.
राष्ट्रीय विक्रमधारक २६ वर्षीय गुलवीरने २८ मिनिटे ३८.६३ सेकंदात शर्यत पूर्ण करून हे यश मिळवले. याआधीचा त्याचा राष्ट्रीय विक्रम २७:००.२२ सेकंदांचा आहे, जो त्याने या वर्षी केला होता.
आशियाई अजिंक्यपद स्पर्धेत गुलवीरचे हे पहिले सुवर्णपदक आहे. त्याच्या मागे जपानच्या मेबुकी सुझुकीने २८:४३.८४ वेळेसह रौप्यपदक जिंकले आणि बहरीनच्या अल्बर्ट किबिची रोपने २८:४६.८२ सेकंदात शर्यत पूर्ण करून कांस्यपदक जिंकले. भारताच्या सावन बारवालनेही चांगली कामगिरी केली आणि २८:५०.५३ वेळेसह चौथे स्थान पटकावले. गुलवीर आता आशियाई चॅम्पियनशिपमध्ये १०,००० मीटर सुवर्णपदक जिंकणारा तिसरा भारतीय ठरला आहे. यापूर्वी हरिचंद (१९७५) आणि जी. लक्ष्मणन (२०१७) यांनी ही कामगिरी केली होती. याशिवाय, गुलवीरने ५००० मीटर शर्यतीत राष्ट्रीय विक्रमही केला आहे आणि तो या स्पर्धेत या स्पर्धेत सहभागी होणार आहे.
सेबॅस्टियनला कांस्यपदक मिळाले
दिवसाची सुरुवात भारताच्या सर्विन सेबॅस्टियनने पुरुषांच्या २० किमी चालण्यात कांस्यपदक जिंकून केली. त्याने १ तास २१ मिनिटे १३.६० सेकंदात शर्यत पूर्ण करून भारताचे खाते उघडले. ही वेळ फेब्रुवारीमध्ये उत्तराखंड राष्ट्रीय खेळांमध्ये केलेल्या त्याच्या वैयक्तिक सर्वोत्तम कामगिरीच्या (१:२१:२३) अगदी जवळ होती. या स्पर्धेत, चीनच्या वांग झाओझाओने १:२०:३६.९० वेळेसह सुवर्णपदक जिंकले आणि जपानच्या केंटो योशिकावाने १:२०:४४.९० वेळेसह रौप्यपदक जिंकले.
अनिल कुशारे अंतिम फेरीत
पुरुषांच्या उंच उडीत, सर्वेश अनिल कुशारेने २.१० मीटर उडी मारून पात्रता गट ब मध्ये चौथे स्थान मिळवले आणि अंतिम फेरीसाठी पात्र ठरला. महिलांच्या भालाफेक स्पर्धेत भारताच्या अनु राणीकडून खूप अपेक्षा होत्या, परंतु तिने ५८.३० मीटरच्या सर्वोत्तम भालाफेकीसह चौथे स्थान मिळवले. अनु राणीच्या नावावर आशियाई क्रीडा स्पर्धेत सुवर्णपदक आणि राष्ट्रीय विक्रम आहे. भारताने या स्पर्धेत एकूण ५९ खेळाडूंच्या संघासह प्रवेश केला आहे. गेल्या वेळी भारतीय संघाने २७ पदके जिंकून चमकदार कामगिरी केली होती आणि यावेळीही दमदार सुरुवात करून चांगली कामगिरी अपेक्षित आहे.
