चंदीगड ः पंजाब किंग्ज संघाचा प्रमुख डावकुरा वेगवान गोलंदाज अर्शदीप सिंग इंग्लंड संघाविरुद्धच्या कसोटी मालिकेत पदार्पण करेल असा विश्वास पंजाब संघाचे प्रशिक्षक रिकी पाँटिंग यांनी व्यक्त केला आहे.
पुढील महिन्यात भारतीय संघ पाच सामन्यांच्या कसोटी मालिकेसाठी इंग्लंडचा दौरा करणार आहे. या महत्त्वाच्या मालिकेसाठी वेगवान गोलंदाज अर्शदीप सिंगचाही संघात समावेश करण्यात आला आहे. माजी ऑस्ट्रेलियन कर्णधार आणि आयपीएलमध्ये पंजाब किंग्जचे मुख्य प्रशिक्षक रिकी पॉन्टिंग यांना विश्वास आहे की अर्शदीप इंग्लंडविरुद्धच्या पहिल्या कसोटी सामन्यात पदार्पण करू शकेल.
पहिल्यांदाच कसोटी संघात स्थान
अर्शदीप सिंग याला पहिल्यांदाच कसोटी संघात स्थान देण्यात आले आहे. आतापर्यंत तो भारतासाठी फक्त मर्यादित षटकांच्या स्वरूपात खेळताना दिसत आहे आणि असे मानले जात आहे की अर्शदीपला इंग्लंडविरुद्धच्या प्लेइंग-११ मध्ये स्थान मिळण्याची संधी मिळेल. पंजाब किंग्ज संघामधील अर्शदीप याची कामगिरी बारकाईने पाहिल्यानंतर, निवडकर्त्यांनी जसप्रीत बुमराह, मोहम्मद सिराज आणि प्रसिद्ध कृष्णा यांच्या वेगवान गोलंदाजी हल्ल्यात या डावखुऱ्या गोलंदाजाचा समावेश करून योग्य निर्णय घेतला आहे असे पॉन्टिंगला वाटते.
पॉन्टिंग म्हणाला की, मला वाटते की अर्शदीप खेळेल. तो इंग्लंडमधील कसोटी मालिकेत खेळेल. मला वाटते की इंग्लंडमध्ये बुमराह आणि सिराजसोबत डावखुरा पर्याय असणे खूप चांगले होईल. इंग्लंडमधील परिस्थिती पाहता, अर्शदीप ज्या पद्धतीने गोलंदाजी करतो, तो इतर कोणत्याही गोलंदाजांपेक्षा सीमचा चांगला वापर करतो. त्यांनी त्याला संघात निवडले आहे. मला वाटते की तो इंग्लंडमधील पहिली कसोटी खेळू शकतो आणि तो कोणालाही निराश करणार नाही. मला वाटते की त्याच्यासाठीही ही योग्य वेळ आहे. कसोटी सामन्यांमध्ये तो भारतासाठी एक उत्तम निवड असेल. अर्शदीप आयपीएलमध्ये पॉवरप्लेमध्ये देखील गोलंदाजी करत आहे आणि त्याच्या नावावर १८ विकेट आहेत.
पॉन्टिंग म्हणाला, अर्शदीप स्पर्धेत पॉवरप्लेमध्ये गोलंदाजी करत आहे, याचा अर्थ तो नवीन चेंडूने चांगले काम करतो. म्हणून जर ते इंग्लंडमध्ये डावखुरा पर्याय शोधत असतील तर तो तिथे आहे.
