चंदीगड ः पंजाब किंग्ज संघाला पराभवाचा धक्का दिल्यानंतर आता फक्त एकच सामना शिल्लक आहे आणि आपण एकत्र आनंद साजरा करू असे आरसीबी संघाचा कर्णधार रजत पाटीदार याने सांगितले.
आयपीएल स्पर्धेच्या पहिल्या क्वालीफायर लढतीत रॉयल चॅलेंजर्स बंगळुरू संघाने पंजाब किंग्ज संघाचा आठ विकेट्सने पराभव केला. गोलंदाजांच्या शानदार कामगिरीनंतर सलामीवीर फिल साल्ट (नाबाद ५६) यांच्या अर्धशतकामुळे आरसीबी संघ विजयी झाला. यासह, आरसीबी संघाने ३ जून रोजी होणाऱ्या अंतिम फेरीत प्रवेश केला. बंगळुरू संघ चौथ्यांदा अंतिम फेरीत पोहोचला आहे, परंतु संघ अजूनही पहिल्या विजेतेपदाची वाट पाहत आहे आणि या वर्षी हा विजेतेपदाचा दुष्काळ संपू शकतो. आरसीबीचा कर्णधार रजत पाटीदारने अंतिम फेरीत पोहोचल्यानंतर चाहत्यांचे आभार मानले आणि सांगितले की, फक्त एक सामना शिल्लक आहे. तो जिंकल्यानंतर आम्ही एकत्र आनंद साजरा करू. आरसीबी संघ यापूर्वी २००९, २०११ आणि २०१६ मध्ये अंतिम फेरीत पोहोचला आहे.
रजत पाटीदार सामन्यानंतर म्हणाला की, ‘आम्हाला कशी गोलंदाजी करायची याबद्दल आमच्या योजनेत आम्ही अगदी स्पष्ट होतो. वेगवान गोलंदाजांनी खेळपट्टीचा चांगला वापर केला आणि सुयश शर्मा यानेही चांगली गोलंदाजी केली. तो स्टंप लाईनवर गोलंदाजी करतो जी त्याची ताकद आहे. मी त्याला काहीही बोलत नाही कारण मी त्याला गोंधळात टाकू इच्छित नाही. फलंदाजांना त्याची गुगली नीट वाचता येत नाही. मी त्याला फक्त एक स्पष्ट संदेश देतो. जर त्याने योजनेनुसार गोलंदाजी करताना काही धावा दिल्या तर ते ठीक आहे.’
कर्णधार पाटीदार यांनीही फिल साल्ट याचे कौतुक केले. कोहली (१२) बाद झाल्यानंतर साल्टने पंजाबच्या गोलंदाजांवर ज्या पद्धतीने ‘हल्ला’ केला तो पाहण्यासारखा होता. २७ चेंडूंच्या त्याच्या नाबाद ५६ धावांच्या खेळीत साल्टने सहा चौकार आणि तीन षटकार मारले. साल्ट म्हणाला, ‘प्रत्येक सामन्यात साल्ट ज्या पद्धतीने फलंदाजी करतो, तो ज्या पद्धतीने सुरुवात करतो, ते विलक्षण आहे. मी त्याचा चाहता आहे. मी नेहमीच आरसीबी चाहत्यांचे आभार मानतो कारण आपण जिथेही जाऊ, तिथे आपल्याला वाटते की ते आपले मैदान आहे. अजून एक सामना (अंतिम) आहे, आपण एकत्र साजरा करू.’
पराभव झाल्यानंतरही पंजाब किंग्जला अंतिम फेरीत पोहोचण्याची आणखी एक संधी मिळेल, जी दुसऱ्या क्वालिफायरमध्ये गुजरात टायटन्स आणि मुंबई इंडियन्स यांच्यातील एलिमिनेटर सामन्यातील विजेत्याशी लढेल.
