रॉजर बिन्नी १९ जुलै रोजी होणार निवृत्त
मुंबई ः भारतीय क्रिकेट नियामक मंडळाचे उपाध्यक्ष राजीव शुक्ला जुलैमध्ये बोर्डाचे कार्यवाहक अध्यक्ष होऊ शकतात. वृत्तसंस्था एएनआयने सूत्रांच्या हवाल्याने ही माहिती दिली आहे.
बीसीसीआयचे विद्यमान अध्यक्ष रॉजर बिन्नी १९ जुलै रोजी ७० वर्षांचे होतील. नियमांनुसार, बीसीसीआय अध्यक्षांचे वय ७० वर्षांपेक्षा जास्त नसावे. ६५ वर्षीय शुक्ला यांना तीन महिन्यांसाठी कार्यवाहक अध्यक्षपदाची भूमिका मिळू शकते. सप्टेंबरमध्ये होणाऱ्या वार्षिक सर्वसाधारण सभेत (एजीएम) राजीव शुक्ला बोर्डाच्या पूर्णवेळ अध्यक्षपदासाठी निवडणूक लढवू शकतात, असे सूत्रांनी सांगितले.
ऑक्टोबर २०२२ मध्ये रॉजर बिन्नी बीसीसीआयचे ३६ वे अध्यक्ष म्हणून निवडून आले. त्यांनी माजी भारतीय कर्णधार सौरव गांगुलीची जागा घेतली. गांगुलीने त्यांचा तीन वर्षांचा कार्यकाळ पूर्ण केला होता. तेव्हा बिन्नी हे सर्वोच्च पदासाठी नामांकन दाखल करणारे एकमेव उमेदवार होते.
रॉजर बिन्नी बीसीसीआय अध्यक्ष झाल्यानंतर, भारताने मर्यादित षटकांच्या स्वरूपातील दोन आयसीसी स्पर्धा जिंकल्या. भारताने २०२४ मध्ये आयसीसी टी२० विश्वचषक आणि २०२५ मध्ये आयसीसी चॅम्पियन्स ट्रॉफी जिंकली. बिन्नी यांच्या अध्यक्षपदाच्या काळात ऐतिहासिक महिला प्रीमियर लीग (डब्ल्यूपीएल) देखील सुरू झाली. अध्यक्षपदाच्या काळात देशांतर्गत क्रिकेटला चांगले प्रोत्साहन मिळाले. खेळाडूंचे पगार वाढले आणि टीम इंडियाच्या वरिष्ठ खेळाडूंना देशांतर्गत स्पर्धांमध्ये खेळण्यासाठी योग्य आणि कठोर पावले उचलण्यात आली.
१९८३ च्या विश्वचषक विजेत्या संघाचा मुख्य खेळाडू असलेला अष्टपैलू बिन्नी यांनी २७ कसोटी सामने आणि ७२ एकदिवसीय सामन्यांमध्ये भारताचे प्रतिनिधित्व केले आहे. त्यांनी कसोटी सामन्यांमध्ये ४७ विकेट्स घेतल्या आणि पाच अर्धशतकांसह ८३० धावा केल्या. ७२ एकदिवसीय सामन्यांमध्ये त्यांनी ७७ विकेट्स घेतल्या आणि एका अर्धशतकाच्या मदतीने ६२९ धावा केल्या. भारताला पहिला एकदिवसीय विश्वचषक (१९८३) जिंकून देण्यात त्यांचे महत्त्वाचे योगदान होते. १९८३ च्या विश्वचषकात ते १८ विकेट्ससह भारतासाठी सर्वाधिक विकेट्स घेणारे गोलंदाज होते. बिन्नी यांनी यापूर्वी बीसीसीआय निवड समितीचे सदस्य म्हणून काम पाहिले आहे.
