जखमींसाठी आरसीबी केअर्स नावाने निधी जमा करणार
बंगळुरू ः रॉयल चॅलेंजर्स बंगळुरू (आरसीबी) फ्रँचायझीने चिन्नास्वामी स्टेडियमबाहेर झालेल्या चेंगराचेंगरीत मृत्युमुखी पडलेल्या ११ चाहत्यांच्या कुटुंबियांना प्रत्येकी १० लाख रुपयांची आर्थिक मदत जाहीर केली आहे.
आरसीबी फ्रँचायझीने आपल्या निवेदनात म्हटले आहे की याशिवाय, या दुःखद घटनेत जखमी झालेल्या चाहत्यांना मदत करण्यासाठी ‘आरसीबी केअर्स’ नावाचा निधीही तयार केला जात आहे. बुधवारी चिन्नास्वामी स्टेडियमबाहेर झालेल्या चेंगराचेंगरीत ११ जणांचा मृत्यू झाला. याशिवाय ३० हून अधिक लोक जखमी झाले.
आरसीबीने १८ व्या हंगामात पहिल्यांदाच आयपीएलचे विजेतेपद जिंकले. बुधवारी जेव्हा संघ अहमदाबादहून बंगळुरूला पोहोचला तेव्हा चाहते संघाची एक झलक पाहण्यासाठी उत्सुक होते. विधान सौधा आणि चिन्नास्वामी स्टेडियममध्ये खेळाडूंचा सन्मान केला जाणार होता. विधान सौधा येथे झालेल्या सत्कार कार्यक्रमानंतर, खेळाडू विजयी परेड करत स्टेडियममध्ये पोहोचणार होते. तथापि, चाहत्यांच्या सुरक्षेसाठी कोणतीही व्यवस्था करण्यात आली नव्हती. विधान सौधा ते चिन्नास्वामी स्टेडियमपर्यंत लाखो चाहते उपस्थित होते. ते कोणत्याही मार्गाने स्टेडियममध्ये प्रवेश करण्यास उत्सुक होते. ते झाडे, कार, बस, त्यांना दिसणारी कोणतीही उंच वस्तूवर चढत होते. इतकेच नाही तर चाहते स्टेडियमच्या भिंती आणि कुंपणांवर चढताना देखील दिसले.
पोलिसांनी स्टेडियम बाहेर लाठीमार केला. त्यानंतर स्टेडियमबाहेर झालेल्या चेंगराचेंगरीत ११ जणांचा मृत्यू आणि अनेक जण जखमी झाल्याचे वृत्त आले. तेव्हापासून कर्नाटकातील काँग्रेस सरकार आणि भाजपमध्ये आरोप-प्रत्यारोपांचा सिलसिला सुरू आहे. भाजपने सिद्धरामय्या सरकारवर गैरव्यवस्थापनाचा आरोप केला आहे, तर काँग्रेसने भाजपवर या प्रकरणात राजकारण करण्याचा आरोप केला आहे.
