मुंबई ः आयडियल स्पोर्ट्स अकॅडमी-ग्रुपतर्फे झालेल्या डॉ जगन्नाथराव हेगडे वाढदिवस चषक १४ वर्षांखालील जलद बुद्धिबळ स्पर्धेत उदयोन्मुख सबज्युनियर बुद्धिबळपटू अधवान ओसवाल व अरेना कॅन्डीडेट मास्टर लोबो फरडीन यांनी दोन वयोगटाच्या स्पर्धा जिंकून डबल धमाका केला.
अधवान ओसवालने ७ व ८ वर्षांखालील वयोगटात सर्व साखळी सामने जिंकून निर्विवाद वर्चस्व राखले. १४ वर्षांखालील गटात अद्वय धूत, निव बाफना यांना चकवून उत्तम सरासरीच्या जोरावर लोबो फरडीनने प्रथम क्रमांकावर झेप घेतली आणि १३ वर्षांखालील गटविजेतेपदा पाठोपाठ लोबोने दुसरे जेतेपद पटकावले. परेल येथील आरएमएसच्या वातानुकुल सभागृहात स्विस लीग पद्धतीने रंगलेल्या स्पर्धेला लायन्स क्लब ऑफ मिडटाऊन, राष्ट्रीय मिल मजदूर संघ व मुंबई शहर जिल्हा बुद्धिबळ संघटना यांचे सहकार्य लाभले होते.
१४ वर्षांखालील गटात लोबो फरडीनने (३.५ गुण) प्रथम, निव बाफनाने (३.५ गुण) द्वितीय, अद्वय धूतने (३ गुण) तृतीय, ध्यान वोराने (२.५ गुण) चौथा, राज गायकवाडने (२.५ गुण) पाचवा क्रमांक मिळवला. ११ वर्षांखालील गटात स्वरा मोरेने (३.५ गुण) प्रथम, विहान शेट्टीने (३ गुण) द्वितीय, शौर्य कामतने (३ गुण) तृतीय, वंश धांडेने (३ गुण) चौथा, कवीश पुरोहितने (३ गुण) पाचवे स्थान मिळवले. ८ वर्षांखालील गटात अधवान ओसवालने (४ गुण) प्रथम, लोबो देत्यनने (३ गुण) द्वितीय, अबीर सभरवालने (३ गुण) तृतीय, सान्वी सिन्हाने (३ गुण) चौथा, मायरा झुनझुनवालाने (२.५ गुण) पाचवा, आयुष जैठलीयाने (२.५ गुण) सहावा पुरस्कार मिळविला.
माजी नगरपाल डॉ जगन्नाथराव हेगेडे, क्रीडाप्रेमी विलास डांगे, विजय रायमाने, जितेंद्र सकपाळ, शिवछत्रपती पुरस्कार प्राप्त लीलाधर चव्हाण यांच्या हस्ते विजेत्यांना गौरविण्यात आले.
