पॅट कमिन्सची भेदक गोलंदाजी, ऑस्ट्रेलिया संघाची २१८ धावांची आघाडी
लंडन : कर्णधार पॅट कमिन्सच्या शानदार कामगिरीच्या मदतीने ऑस्ट्रेलियाने पहिल्या डावात दक्षिण आफ्रिकेला १३८ धावांत गुंडाळले. त्यानंतर ऑस्ट्रेलियाने फलंदाजी करत दुसऱ्या डावात आठ बाद १४४ धावा काढल्या. त्यामुळे ऑस्ट्रेलिया संघाची आघाडी आता २१८ धावांची झाली आहे. ऑस्ट्रेलियाने पहिल्या डावात ७४ धावांची आघाडी घेत सामन्यावर आपली पकड अधिक घट्ट केली आहे. लॉर्ड्स मैदानावर आतापर्यंत २०० प्लस टार्गेट फक्त चार वेळेस यशस्वीरित्या गाठण्यात यश आलेले आहे. २००५ पासून एकदाच घडले आहे.
ऑस्ट्रेलिया संघाने दुसऱ्या डावात दुसऱ्या दिवसअखेर ४० षटकांच्या खेळात आठ बाद १४४ धावा काढल्या आहेत. त्यात अॅलेक्स कॅरी याने सर्वाधिक ४३ धावा फटकावल्या. लाबुशेन (२२), स्मिथ (१३), स्टार (नाबाद १६) यांनीच धावांचा दुहेरी आकडा गाठला आहे. ख्वाजा (६), ग्रीन (०), हेड (९), वेबस्टर (९), कमिन्स (६) हे फलंदाज लवकर बाद झाले. दुसऱ्या दिवसाचा खेळ थांबला तेव्हा स्टार्क १६ तर लायन १ धावांवर खेळत आहेत. दक्षिण आफ्रिका संघाकडून रबाडा (३-४४), लुंगी न्गिडी (३-३५) यांनी प्रत्येकी तीन विकेट घेतल्या.
ऑस्ट्रेलियाने पहिल्या डावात २१२ धावा केल्या होत्या. परंतु, कमिन्स आणि इतर वेगवान गोलंदाजांच्या दमदार कामगिरीच्या मदतीने ते आघाडी घेण्यास यशस्वी झाले. ऑस्ट्रेलियाकडून कमिन्सने सहा बळी घेतले, तर मिशेल स्टार्कने दोन आणि जोश हेझलवूडला एक यश मिळाले. दक्षिण आफ्रिकेची फलंदाजी इतकी खराब होती की संघाचे फक्त चार फलंदाज दुहेरी आकड्यापर्यंत पोहोचू शकले.
दक्षिण आफ्रिकेकडून डेव्हिड बेडिंगहॅमने सर्वाधिक ४५ धावा केल्या, तर कर्णधार टेम्बा बावुमा ३६ धावा काढून बाद झाला. रायन रिकलटनने १६ आणि काइल व्हेरेनने १३ धावांचे योगदान दिले. कमिन्सनेही डावात पाच बळी पूर्ण केले. कमिन्सने सध्याच्या वर्ल्ड कपच्या चक्रात सर्वाधिक पाच बळी घेतले आहेत. त्याने वर्ल्ड कप २०२३-२५ चक्रात सहाव्यांदा असे केले. एवढेच नाही तर कमिन्स सध्याच्या जागतिक कसोटी चॅम्पियनशिप सायकलमध्ये सर्वाधिक विकेट घेणारा गोलंदाजही बनला आहे. त्याने २०२३-२५ सायकलमध्ये आतापर्यंत ७९ विकेट घेतल्या आहेत. दोन्ही प्रकरणांमध्ये त्याने भारताच्या जसप्रीत बुमराहला मागे टाकले आहे.
दक्षिण आफ्रिकेसाठी बावुमा आणि बेडिंगहॅम यांच्यात एकमेव मोठी भागीदारी झाली. दुसऱ्या दिवशी या दोन्ही फलंदाजांनी ४३ धावांवरून ४ विकेटसाठी डाव पुढे नेला. बावुमा आणि बेडिंगहॅम यांनी पाचव्या विकेटसाठी ६४ धावांची भागीदारी केली, परंतु ही भागीदारी तुटताच दक्षिण आफ्रिकेचा डाव कोसळला. दक्षिण आफ्रिकेकडून वियान मुल्डर सहा, ट्रिस्टन स्टब्स दोन, केशव महाराज सात आणि कागिसो रबाडा एक धावा काढू शकले नाहीत, तर एडेन मार्कराम आणि मार्को जॅन्सन यांना खातेही उघडता आले नाही.
३०० विकेट्स पूर्ण करणारा आठवा ऑस्ट्रेलियन
पॅट कमिन्सने कसोटी क्रिकेटमध्ये ३०० विकेट्स पूर्ण केल्या आहेत आणि तो असा करणारा आठवा ऑस्ट्रेलियन गोलंदाज आहे. ऑस्ट्रेलियासाठी कसोटीत सर्वाधिक विकेट घेणाऱ्या गोलंदाजांमध्ये कमिन्स सहाव्या स्थानावर पोहोचला आहे. तो ग्लेन मॅकग्रा, मिशेल स्टार्क, डेनिस लिली, मिशेल जॉन्सन आणि ब्रेट ली यांच्या यादीत सामील झाला आहे.
कर्णधार म्हणून नवव्यांदा पाच विकेट
कमिन्सने कर्णधार म्हणून नवव्यांदा एका डावात पाच किंवा त्याहून अधिक विकेट घेतल्या आहेत. कसोटीत सर्वाधिक पाच विकेट घेणारा कर्णधार इम्रान खान आहे, ज्याने १२ वेळा असे केले आहे. कमिन्स आणि रिची बेनॉड या यादीत दुसऱ्या स्थानावर आहेत, त्यांनी प्रत्येकी नऊ वेळा पाच विकेट घेतल्या आहेत.
