टी २० क्रिकेट सामन्यात तीन सुपर ओव्हर, नेदरलँड्स संघाने षटकार ठोकून नोंदवला विजय
ग्लासगो ः सध्या स्कॉटलंड, नेपाळ आणि नेदरलँड्स या संघांमध्ये टी २० तिरंगी मालिका खेळली जात आहे. या मालिकेतील दुसऱ्या सामन्यात एक ऐतिहासिक दृश्य पाहायला मिळाले. टिटवुड मैदानावर नेपाळ आणि नेदरलँड्स यांच्यात खेळलेला हा सामना प्रथम बरोबरीत सुटला. त्यानंतर सामन्याचा निकाल मिळविण्यासाठी ३-३ सुपर ओव्हर खेळवण्यात आले. टी २० क्रिकेटमध्ये एकाच सामन्यात तीन सुपर ओव्हर खेळवण्याची ही पहिलीच वेळ आहे.
तीनदा टाय झालेला सामना अतिशय रोमांचक झाला. प्रथम फलंदाजी करताना नेदरलँड्सच्या संघाने २० षटकांत ७ विकेट गमावून १५२ धावा केल्या. या सामन्यात नेपाळच्या फिरकीपटूंनी शानदार कामगिरी केली, विशेषतः संदीप लामिछानेने या सामन्यात शानदार गोलंदाजी केली. त्याने आपल्या चार षटकांच्या स्पेलमध्ये १८ धावा देऊन ३ विकेट घेतल्या. नेदरलँड्सकडून तेजा निदामानुरू सर्वाधिक धावा करणारा गोलंदाज होता. त्याने ३५ धावांचे योगदान दिले. त्याच वेळी, विक्रमजीत सिंग ३० धावा काढून बाद झाला. साकिब झुल्फिकारनेही २५ धावा केल्या.
प्रत्युत्तरात, नेपाळच्या संघानेही २० षटकांत ८ गडी गमावून १५२ धावा केल्या, ज्यामुळे सामना बरोबरीत सुटला. संघाकडून कुशल भुर्तेल (३४) आणि रोहित पौडेल (४८) यांनी चांगली फलंदाजी केली. शेवटच्या चेंडूवर नंदन यादवने चौकार मारून सामना बरोबरीत सोडवला. त्यामुळे सामना सुपर ओव्हरमध्ये गेला. डॅनियल डोराम हा नेदरलँड्सचा सर्वात यशस्वी गोलंदाज होता, त्याने त्याच्या चार षटकांत १४ धावा देऊन ३ विकेट घेतल्या.
सुपर ओव्हरचा थरार कसा होता?
सुपर ओव्हरबद्दल बोलायचे झाले तर, नेपाळने प्रथम फलंदाजी केली आणि पहिल्या सुपर ओव्हरमध्ये १९ धावा केल्या. परंतु नेदरलँड्स संघानेही प्रत्युत्तरात १९ धावा करण्यात यश मिळवले, अशा प्रकारे पहिली सुपर ओव्हर देखील बरोबरीत सुटली. त्यानंतर दुसरी सुपर ओव्हर खेळवण्यात आली, जिथे दोन्ही संघांनी १७-१७ धावा केल्या. अशा परिस्थितीत दुसरी सुपर ओव्हर बरोबरीत सुटली. दोन सुपर ओव्हर बरोबरीत सुटल्यानंतर चाहत्यांचा या सामन्याबद्दलचा उत्साह शिगेला पोहोचला होता. तिसऱ्या सुपर ओव्हरबद्दल बोलायचे झाले तर, नेपाळच्या संघाने एकही धाव न काढता दोन्ही विकेट गमावल्या. त्यानंतर, नेदरलँड्स संघाने पहिल्या चेंडूवर षटकार मारून सामना जिंकला.
