मुंबई ः भारतीय क्रीडा प्राधिकरण (साईI) आरसी मुंबईच्या कुस्तीपटूंनी १८ ते २६ जून दरम्यान व्हिएतनाममध्ये झालेल्या प्रतिष्ठित अंडर २३ आशियाई कुस्ती अजिंक्यपद स्पर्धेत रौप्य पदके जिंकून आपला दबदबा कायम ठेवला.
भारतीय महिला कुस्तीपटू प्रगती गायकवाड आणि तन्वी मगदूम यांच्या उल्लेखनीय कामगिरीने देशाचा नावलौकिक वाढला. साई नॅशनल सेंटर ऑफ एक्सलन्स (एनसीओई) मुंबई येथील समर्पित कुस्तीपटू प्रगती गायकवाडने ६२ किलो महिला कुस्ती प्रकारात असाधारण धैर्य आणि प्रतिभा दाखवली. अनेक दमदार कामगिरीनंतर अंतिम फेरीत पोहोचताना प्रगतीचा सामना मंगोलियाच्या अनुदरी बटखुयागविरुद्ध एका चुरशीच्या सुवर्णपदकाच्या सामन्यात झाला. शौर्यपूर्ण प्रयत्नांनंतरही प्रगती हिला रौप्य पदकावर समाधान मानावे लागले. देशाला रौप्य पदक जिंकून देत तिने भारताच्या युवा कुस्ती प्रतिभेची ताकद दाखवून दिली.
एसएआय आरसी मुंबई अंतर्गत दत्तक घेतलेल्या कोल्हापूर येथील जय शिवराय आखाड्याचे प्रतिनिधित्व करणारी तन्वी मगदूम हिने ५९ किलो वजनी गटात आपल्या कामगिरीने भारताला अभिमानित केले. तन्वीने तिच्या चारपैकी तीन सामने जिंकले, किर्गिस्तान, मंगोलिया आणि कझाकस्तान मधील अव्वल स्पर्धकांना हरवले. तिचा एकमेव पराभव उझबेकिस्तानच्या कुस्तीगीराविरुद्धच्या अंतिम लढतीत झाला आणि तिने भारतासाठी प्रशंसनीय रौप्य पदक मिळवून दिले.
हे उत्कृष्ट निकाल खेलो इंडिया उपक्रम, दत्तक घेतलेल्या आखाड्या आणि एनसीओईसह एसएआयच्या तळागाळातील आणि उच्चभ्रू खेळाडू विकास कार्यक्रमांच्या वाढत्या प्रभावाचे प्रतीक आहेत, जे उद्याच्या चॅम्पियन्स खेळाडूंना जोपासत आहेत. एसएआय आरसी मुंबई दोन्ही खेळाडू आणि त्यांच्या प्रशिक्षकांचे मनापासून अभिनंदन करते. तसेच स्पोर्ट्स ऑथॉरिटी ऑफ इंडियाचे प्रादेशिक संचालक पांडुरंग चाटे यांनी पदक विजेत्या कुस्तीपटूंचे अभिनंदन केले आहे.
