नवी दिल्ली ः भारतीय संघाच्या इंग्लंड दौऱ्याची सुरुवात अपेक्षेनुसार झाली नाही, ज्यामध्ये त्यांना पाच सामन्यांच्या कसोटी मालिकेतील पहिल्या सामन्यात ५ विकेटने पराभव स्वीकारावा लागला. लीड्सच्या मैदानावर खेळल्या गेलेल्या मालिकेतील पहिल्या कसोटी सामन्यात भारतीय संघाने इंग्लंडला चौथ्या डावात जिंकण्यासाठी ३७१ धावांचे लक्ष्य दिले होते. या धावसंख्येचा बचाव करण्यात गोलंदाज पूर्णपणे अपयशी ठरले. या सामन्यात जसप्रीत बुमराह व्यतिरिक्त इतर भारतीय वेगवान गोलंदाज पूर्णपणे अपयशी ठरले. या निष्प्रभ कामगिरीबद्दल आता मोहम्मद शमी याने बुमराहकडून अन्य गोलंदाजांनी शिकावे असा सल्ला दिला आहे.
लीड्स कसोटी सामन्यात भारतीय संघाच्या पराभवानंतर मोहम्मद शमीने त्याच्या यूट्यूब चॅनेलवर म्हटले आहे की भारतीय संघाच्या उर्वरित गोलंदाजांनी बुमराहशी बोलून त्याच्याकडून शिकले पाहिजे. त्याच्यासोबत नियोजन करण्यासोबतच त्यांनी त्याला पाठिंबा देण्याचा प्रयत्न केला पाहिजे. जर उर्वरित गोलंदाजांनी लीड्स कसोटीत बुमराहला पाठिंबा दिला असता तर आपण तो सामना सहज जिंकू शकलो असतो.
पहिल्या सामन्यातील पराभवाबद्दल बोलायचे झाले तर, आपल्याला आपल्या गोलंदाजीत थोडे अधिक मेहनत घेण्याची गरज आहे. दुसऱ्या डावात शार्दुलने सलग २ बळी घेतले, पण तोपर्यंत सामना भारतीय संघाच्या हातून खूप दूर होता. आपल्याला नवीन चेंडूने विकेट घ्यायच्या आहेत. पहिल्या कसोटीत इंग्लंडच्या विजयाचे मोठे कारण म्हणजे आपण त्यांना सहज धावा करू दिल्या.
इंग्लंड दौऱ्यासाठी जेव्हा भारतीय संघाची घोषणा होणार होती, तेव्हा सर्वांना अपेक्षा होती की त्यात मोहम्मद शमीचे नाव दिसेल, परंतु त्याची निवड झाली नाही. जेव्हा टीम इंडियाचे मुख्य निवडकर्ता अजित आगरकर यांना शमीची निवड न करण्याचे कारण विचारण्यात आले तेव्हा त्यांनी स्पष्ट केले की तो पूर्णपणे तंदुरुस्त नाही. इंग्लंड दौऱ्यावर, टीम इंडियाला आता २ जुलैपासून एजबॅस्टन मैदानावर मालिकेचा पुढील सामना खेळायचा आहे, ज्यामध्ये प्लेइंग ११ मध्ये काही बदल अपेक्षित आहेत.
