गिल-जडेजा-सुंदरची शानदार फलंदाजी, भारत सर्वबाद ५८७; इंग्लंड तीन बाद ७७
बर्मिंगहॅम : कर्णधार शुभमन गिल याने दुसऱ्या कसोटीत २६९ धावांची ऐतिहासिक द्विशतकी खेळी करुन अनेक विक्रमांना गवसणी घातली. गिलच्या विक्रमी खेळीमुळे भारतीय संघाने पहिल्या डावात सर्वबाद ५८७ धावसंख्या उभारली. त्यानंतर आकाश दीप व सिराजने घातक गोलंदाजी करत इंग्लंडची दाणादाण उडवून दिली. इंग्लंडने दिवसअखेर तीन बाद ७७ धावा काढल्या आहेत.
कसोटीचा दुसरा दिवस शुभमन गिलच्या विक्रमी द्विशतकी खेळीने संस्मरणीय ठरला. कर्णधार शुभमन गिलच्या कसोटी कारकिर्दीतील हे पहिले द्विशतक आहे. इंग्लंडमध्ये द्विशतक झळकावणारा गिल हा पहिला भारतीय कर्णधार आहे. त्याने ३११ चेंडूत हे काम केले. गिलच्या दमदार खेळीच्या जोरावर भारताने इंग्लंडविरुद्ध १५१ षटकात सर्वबाद ५८७ धावसंख्या उभारली आहे. गिल याने जडेजा समवेत २०३ धावांची भागीदारी केली. त्यानंतर गिल-सुंदर या जोडीने १४४ धावांची भागीदारी केली. या दोन भागीदारींमुळे इंग्लंड संघ बॅकफूटवर गेला. सुंदर ४२ धावांवर बाद झाला. त्यानंतर भारताचा डाव लवकर संपुष्टात आला. शोएब बशीरने १६७ धावांत तीन विकेट घेतल्या.
भारताची घातक गोलंदाजी
बुमराहच्या जागी खेळत असलेला वेगवान गोलंदाज आकाश दीप याने दुसऱ्या षटकात इंग्लंडला दोन मोठे धक्के दिले. बेन डकेट (०) व ऑली पोप (०) या आक्रमक फलंदाजांना आकाश दीपने लागोपाठ बाद करुन इंग्लंड संघावर दबाव वाढवला. त्यानंतर सिराज याने झॅक क्रॉली याला १९ धावांवर बाद करुन तिसरा धक्का दिला. शुभमन गिल, केएल राहुल व करुण नायर या तिघांनी स्लिपमध्ये अप्रतिम झेल टिपल्याने इंग्लंडची स्थिती तीन बाद २५ अशी बिकट झाली. त्यानंतर जो रुट (१८) आणि हॅरी ब्रूक (३०) यांनी चौथ्या विकेटसाठी नाबाद ५२ धावांची भागीदारी करत डाव सावरला. दुसऱ्या दिवशीचा खेळ संपला तेव्हा इंग्लंडने २० षटकात तीन बाद ७७ धावा काढल्या आहेत. आकाश दीपने ३६ धावांत दोन तर सिराजने २१ धावांत एक विकेट घेतली.
जडेजासोबत उत्तम भागीदारी
भारताने दुसऱ्या दिवसाची सुरुवात पाच बाद ३१० धावांवर केली होती, परंतु गिल आणि रवींद्र जडेजा यांनी सहाव्या विकेटसाठी २०३ धावा जोडून भारताला मजबूत धावसंख्या गाठून दिली. जडेजा शतक पूर्ण करू शकला नाही आणि ८९ धावा काढल्यानंतर बाद झाला, परंतु गिलने आपले द्विशतक पूर्ण केले. जडेजा आणि गिल यांच्यातील २००+ धावांची ही भागीदारी इंग्लंडविरुद्ध भारतीय जोडीमधील सहाव्या किंवा त्याखालील विकेटसाठी तिसरी सर्वात मोठी भागीदारी आहे. यापूर्वी, २०२२ मध्ये ऋषभ पंत आणि रवींद्र जडेजा यांनी याच मैदानावर (एजबॅस्टन) २२२ धावांची भागीदारी केली होती.
भारतीय कसोटी कर्णधाराने द्विशतक झळकावले
गिलने द्विशतक झळकावणाऱ्या भारतीय कसोटी कर्णधारांच्या यादीत स्थान मिळवले आहे. कोहलीने कर्णधार म्हणून सात वेळा कसोटीत द्विशतक झळकावले आहे, तर मन्सूर अली खान पतौडी, गावस्कर, सचिन, महेंद्रसिंग धोनी आणि गिल यांनी प्रत्येकी एकदा कर्णधार म्हणून द्विशतक झळकावले आहे. परदेशात कसोटीत द्विशतक झळकावणारा गिल हा कोहली नंतरचा दुसरा भारतीय कर्णधार आहे. त्याच वेळी, सेना देशांमध्ये (दक्षिण आफ्रिका, इंग्लंड, न्यूझीलंड आणि ऑस्ट्रेलिया) द्विशतक झळकावणारा गिल हा पहिला आशियाई कर्णधार आहे. त्याच्या आधी, या देशांमध्ये सर्वाधिक धावा करण्याचा विक्रम श्रीलंकेचा माजी फलंदाज तिलकरत्ने दिलशानच्या नावावर आहे, ज्याने २०११ मध्ये लॉर्ड्सवर १९३ धावा केल्या होत्या.
इंग्लंडमध्ये द्विशतक झळकावणारा ११ वा कर्णधार
गिल हा कसोटीत द्विशतक झळकावणारा भारताचा दुसरा सर्वात तरुण कर्णधार आहे. त्याने या बाबतीत सचिन तेंडुलकर आणि विराट कोहलीला मागे टाकले आहे. गिलने २५ वर्षे २९८ दिवसांच्या वयात ही कामगिरी केली आहे. भारतासाठी कसोटीत दुहेरी शतक ठोकणारा सर्वात तरुण कर्णधार एम पतौडी यांच्या नावावर आहे, त्यांनी १९६४ मध्ये दिल्ली येथे खेळल्या गेलेल्या सामन्यात इंग्लंडविरुद्ध ही कामगिरी केली. पतौडी यांनी २३ वर्षे ३९ दिवसांच्या वयात कर्णधार म्हणून कसोटीत दुहेरी शतक ठोकले.
सचिनने १९९९ मध्ये न्यूझीलंडविरुद्ध कर्णधार म्हणून कसोटीत दुहेरी शतक ठोकले, त्यावेळी त्याचे वय २६ वर्षे १८९ दिवस होते. त्याच वेळी, कोहलीने २०१६ मध्ये वेस्ट इंडिजविरुद्ध कर्णधार म्हणून कसोटीत दुहेरी शतक ठोकले होते, तेव्हा वय २७ वर्षे २६० दिवस होते. इंग्लंडमध्ये एकूण ११ कर्णधारांनी दुहेरी शतके ठोकली आहेत, त्यापैकी चार यजमान संघाचे आहेत, तर सात पाहुण्या संघाचे आहेत. इंग्लंडमध्ये कर्णधार म्हणून सर्वात तरुण वयात दुहेरी शतक ठोकण्याच्या बाबतीत फक्त ग्रॅमी स्मिथ गिलच्या पुढे आहे. स्मिथने २००३ मध्ये २२ वर्षे १७५ दिवसांच्या वयात हे केले.
इंग्लंडमध्ये सर्वात मोठी कसोटी खेळणारे भारतीय खेळाडू:
शुभमन गिल-२६९ धावा
सुनील गावस्कर-२२१ धावा
राहुल द्रविड-२१७ धावा
सचिन तेंडुलकर-१९३ धावा
