बुलावायो ः झिम्बाब्वेविरुद्धच्या दुसऱ्या कसोटी सामन्याच्या दुसऱ्या दिवशी दक्षिण आफ्रिकेचा फलंदाज वियान मुल्डरने कसोटी इतिहासातील दुसरे सर्वात जलद त्रिशतक झळकावले. मुल्डरने झिम्बाब्वेविरुद्ध शानदार फलंदाजी केली. मुल्डर या सामन्यात कर्णधार आहे आणि तो त्रिशतक झळकावणारा पहिला दक्षिण आफ्रिकेचा कर्णधार आहे. मुल्डरने २९७ चेंडूत आपले त्रिशतक पूर्ण केले.
मुल्डरने ३३४ चेंडूत ४९ चौकार आणि चार षटकारांसह ३६७ धावा काढल्यानंतर नाबाद राहिला, ज्यामुळे दक्षिण आफ्रिकेने पाच विकेट गमावून ६२६ धावांवर आपला पहिला डाव घोषित केला. मुल्डर व्यतिरिक्त, दक्षिण आफ्रिकेकडून डेव्हिड बेडिंगहॅमने ८२, लुहान ड्राई प्रिटोरियसने ७८, डेवाल्ड ब्रेव्हिसने ३०, टोनी डी जिओर्गीने १० आणि लेसेगो सेनोवेनने तीन धावा केल्या, तर काइल व्हेरेन ४२ धावा करून नाबाद परतला.
अमलाची बरोबरी
फक्त माजी भारतीय फलंदाज वीरेंद्र सेहवागने मुल्डर पेक्षा जलद त्रिशतक झळकावले आहे. २००८ मध्ये चेन्नई येथे दक्षिण आफ्रिकेविरुद्ध सेहवागने २७८ चेंडूत त्रिशतक झळकावले. कसोटीत त्रिशतक झळकावणारा मुल्डर हा दुसरा दक्षिण आफ्रिकेचा फलंदाज आहे. त्याच्या आधी हाशिम अमलाने २०१२ मध्ये इंग्लंडविरुद्ध नाबाद ३११ धावा करून असे केले होते. दुसऱ्या दिवशी मुल्डरने २६४ धावांपासून खेळायला सुरुवात केली आणि जास्त विलंब न करता आपले त्रिशतक पूर्ण केले.
मुल्डर त्रिशतक झळकावणारा सर्वात तरुण कसोटी कर्णधार
मुल्डरने या खेळीसह अनेक विक्रम केले. कर्णधार म्हणून पदार्पणात त्रिशतक झळकावणारा तो पहिला फलंदाज आहे. कर्णधार म्हणून पदार्पणात सर्वाधिक धावा करण्याच्या बाबतीत त्याने न्यूझीलंडच्या ग्रॅहम डोलिंगला मागे टाकले, ज्याने १९६९ मध्ये भारताविरुद्ध २३९ धावा केल्या होत्या. त्याच वेळी, मुल्डर दक्षिण आफ्रिकेसाठी कर्णधार म्हणून सर्वाधिक धावा करणारा फलंदाज बनला आहे. या बाबतीत त्याने ग्रॅमी स्मिथला मागे टाकले ज्याने २००३ मध्ये इंग्लंडविरुद्ध २७७ धावा केल्या होत्या. मुल्डर २७ वर्षे १३८ दिवसांच्या वयात त्रिशतक करणारा सर्वात तरुण कसोटी कर्णधार ठरला. त्याने ऑस्ट्रेलियाचा माजी कर्णधार बॉब सिम्पसनचा ६१ वर्षांचा जुना विक्रम मोडला ज्याने १९६४ मध्ये २८ व्या वर्षी इंग्लंडविरुद्ध ३११ धावा केल्या होत्या.
