झिम्बाब्वे संघावर एक डाव आणि २३६ धावांनी मात
बुलावायो ः झिम्बाब्वेला दुसऱ्या कसोटी सामन्यात दारुण पराभव पत्करावा लागला आणि दक्षिण आफ्रिकेने इतिहासातील तिसरा सर्वात मोठा विजय नोंदवला आहे.
झिम्बाब्वे आणि दक्षिण आफ्रिका यांच्यातील दोन सामन्यांच्या कसोटी मालिकेतील दुसरा सामना बुलावायो येथे खेळला गेला. या सामन्यात दक्षिण आफ्रिकेने वियान मुल्डरच्या शानदार अष्टपैलू कामगिरीच्या जोरावर झिम्बाब्वेचा एक डाव आणि २३६ धावांनी पराभव केला. दक्षिण आफ्रिकेचा त्यांच्या कसोटी इतिहासातील हा तिसरा सर्वात मोठा विजय आहे. त्याचबरोबर, हा त्यांचा कसोटीतील सलग १० वा विजय आहे.
दक्षिण आफ्रिकेने गाजवले वर्चस्व
या सामन्यात झिम्बाब्वेने नाणेफेक जिंकून दक्षिण आफ्रिकेला प्रथम फलंदाजी करण्यास सांगितले. प्रथम फलंदाजी करताना आफ्रिकन संघाने ५ गडी गमावून ६२५ धावा काढल्यानंतर डाव घोषित केला. कर्णधार वियान मुल्डरने संघासाठी त्रिशतक झळकावले. ३६७ धावा करून तो नाबाद परतला. त्याच्या व्यतिरिक्त, डेव्हिड बेडिंगहॅमने ८२ आणि लुआन-ड्रे प्रिटोरियसने ७८ धावांचे योगदान दिले. प्रत्युत्तरात, झिम्बाब्वेचा पहिला डाव १७० धावांवर संपुष्टात आला. त्यानंतर, फॉलो-ऑन खेळताना, यजमान संघ दुसऱ्या डावात २२० धावांवर कोसळला. आफ्रिकन संघाकडून प्रेनेलन सुब्रायनने पहिल्या डावात सर्वाधिक ४ बळी घेतले.
झिम्बाब्वेच्या फलंदाजांनी निराशा केली
झिम्बाब्वेची फलंदाजी दोन्ही डावांमध्ये खूप खराब होती. पहिल्या डावात विल्यम्स (८३ धावा) वगळता कोणताही फलंदाज मोठा डाव खेळू शकला नाही. संघाचे ५ फलंदाज दुहेरी आकडाही गाठू शकले नाहीत. दुसऱ्या डावातही झिम्बाब्वेच्या फलंदाजांची स्थिती खूपच वाईट होती. तथापि, यावेळी निक वॉल्चने अर्धशतकी खेळी केली आणि तो ५५ धावा करून बाद झाला. याशिवाय, कर्णधार इर्विन (४९) आणि ताकुडझवानाशे कैतानो (४०) यांनीही त्यांच्याकडून प्रयत्न केले, परंतु ते संघाला डावाच्या पराभवापासून वाचवू शकले नाहीत.
विआन मुल्डरने अनेक विक्रम केले
या सामन्यात आफ्रिकेचा कर्णधार विआन मुल्डरने कसोटी क्रिकेटच्या इतिहासातील दुसरे सर्वात जलद त्रिशतक झळकावले. त्याने २९७ चेंडूत ही कामगिरी केली. कसोटीत सर्वात जलद त्रिशतक झळकावण्याचा विक्रम वीरेंद्र सेहवागच्या नावावर आहे, त्याने २००७-०८ मध्ये दक्षिण आफ्रिकेविरुद्ध २७८ चेंडूत त्रिशतक झळकावले होते. कर्णधारपदाच्या पदार्पणात त्रिशतक झळकावणारा मुल्डर पहिला फलंदाज बनला आहे. विआन मुल्डरने गोलंदाजी तसेच फलंदाजीतही उत्कृष्ट कामगिरी केली. तेथे त्याने दोन्ही डावांमध्ये एकूण ३ बळी घेतले. मालिकेच्या पहिल्या सामन्यात त्याने १४७ धावांची खेळीही खेळली. दोन्ही सामन्यांमध्ये उत्कृष्ट कामगिरी केल्याबद्दल त्याला सामनावीर आणि मालिकावीर पुरस्कार मिळाला.
