नवी दिल्ली ः तेलंगणा सीआयडीने हैदराबाद क्रिकेट असोसिएशन (एचसीए) चे अध्यक्ष जगन मोहन राव आणि इतर चार जणांना चौकशीसाठी ताब्यात घेतले. ज्या प्रकरणात सनरायझर्स हैदराबादने आयपीएल २०२५ दरम्यान एचसीएवर ब्लॅकमेलिंगचा आरोप केला होता, त्या प्रकरणात सीआयडीने ही कारवाई केली आहे.
वृत्तसंस्था पीटीआयने एका वरिष्ठ पोलिस अधिकाऱ्याचा हवाला देत म्हटले आहे की एचसीएचे अध्यक्ष जगन मोहन राव, कोषाध्यक्ष सी श्रीनिवास राव, सीईओ सुनील कांते, सरचिटणीस राजेंद्र यादव आणि त्यांच्या पत्नी जी कविता यांच्यासह एचसीए अधिकाऱ्यांना चौकशीसाठी ताब्यात घेण्यात आले आहे.
यापूर्वी, तेलंगणाचे मुख्यमंत्री ए रेवंत रेड्डी यांनी एचसीएकडून वारंवार होणारे ‘ब्लॅकमेलिंग’ थांबवण्यासाठी क्रिकेट प्रशासकीय संस्थांना हस्तक्षेप करण्याची मागणी करणाऱ्या सनरायझर्स हैदराबादच्या याचिकेची चौकशी करण्याचे आदेश दिले होते. तथापि, राज्य युनिटने फ्रँचायझीने लावलेले असे सर्व आरोप फेटाळून लावले होते.
