हरारे ः सलामीवीर डेव्हॉन कॉनवे याने अनेक जीवदानांचा फायदा घेत नाबाद अर्धशतक झळकावले आणि न्यूझीलंडने तीन देशांच्या टी २० आंतरराष्ट्रीय मालिकेत झिम्बाब्वेचा ३७ चेंडू शिल्लक असताना आठ विकेट्सने पराभव केला.
मॅट हेन्री (२६ धावांत तीन विकेट्स) यांच्या नेतृत्वाखालील गोलंदाजांच्या शानदार कामगिरीमुळे झिम्बाब्वेचा डाव सात विकेट्समध्ये १२० धावांवर रोखल्यानंतर न्यूझीलंडने १३.५ षटकांत दोन विकेट्सच्या मोबदल्यात १२२ धावा केल्या.
टिम सेफर्ट (तीन) लवकर बाद झाल्यानंतर कॉनवेने ४० चेंडूंत चार चौकार आणि दोन षटकारांसह नाबाद ५९ धावा केल्या. सामन्यात त्याला किमान आठ जीवदान मिळाले. एका धावेच्या स्कोअरवर त्याचा झेल हुकला, त्यानंतर तो ३४ धावांवर असताना रनआउटपासून वाचला आणि एलबीडब्ल्यू अपील त्याच्या बाजूने होता. याशिवाय, त्याचे अनेक शॉट्स हवेत उडून क्षेत्ररक्षकांच्या हातून निसटले.
टी २० आंतरराष्ट्रीय क्रिकेटमध्ये १७ महिन्यांत पहिले अर्धशतक ठोकण्याव्यतिरिक्त, कॉनवेने रचिन रवींद्र (१९ चेंडूत ३० धावा) आणि डॅरिल मिशेल (१९ चेंडूत नाबाद २६ धावा) यांच्यासोबत दुसऱ्या विकेटसाठी ५९ धावांची नाबाद भागीदारी करून संघाला लक्ष्यापर्यंत सहज पोहोचवले. झिम्बाब्वेचे सलामीवीर वेस्ली माधेवरे (३२ चेंडूत ३६ धावा) आणि ब्रायन बेनेट (१९ चेंडूत २० धावा) यांनी न्यूझीलंडच्या गोलंदाजांचा आक्रमकपणे सामना केला. तथापि, पॉवरप्लेच्या शेवटी बेनेट हेन्रीचा बळी ठरला. यानंतर, झिम्बाब्वेच्या फलंदाजांनी नियमित अंतराने विकेट गमावल्या आणि संघाचा धावगती दर कमी होत गेला.
