कासार्डे येथे आयोजित क्रीडा शिक्षक सभेत प्रतिपादन
सिंधुदुर्ग ः खेळ आणि खेळाडूंना पुरक ठरणारी शासकीय योजनांची माहिती क्रीडा शिक्षकांनी शाळा आणि संस्थेपर्यंत पोहचवावी, आजच्या स्पर्धात्मक आणि तंत्रज्ञानमुळे गतिमान होत चाललेल्या युगामध्ये आजची पिढी सुदृढ आणि सक्षम करण्यासाठी विद्यार्थी हा केंद्रबिंदू ठेवून क्रीडा शिक्षकांनी खेळात करिअर करीत असे खेळाडू घडवावेत असे आवाहन सिंधुदुर्ग जिल्हा क्रीडा अधिकारी नीलिमा अडसूळ यांनी कासार्डे येथे केले.
जिल्हा क्रीडा परिषद व जिल्हा क्रीडा अधिकारी कार्यालय सिंधुदुर्ग आयोजित शालेय क्रीडा स्पर्धा कणकवली, देवगड आणि वैभववाडी तालुका सभेचे आयोजन कणकवली तालुक्यातील कासार्डे माध्यमिक व उच्च माध्यमिक विद्यालय कासार्डे येथे करण्यात आले होते. याप्रसंगी अध्यक्षीय भाषणात नीलिमा अडसूळ या क्रीडा शिक्षकांना मार्गदर्शन करताना बोलत होत्या.
या प्रसंगी व्यासपीठावर कणकवली तालुका क्रीडा अधिकारी राहुल गायकवाड वैभववाडी व देवगड तालुका क्रीडा अधिकारी सचिन रणदिवे, क्रीडा अधिकारी शीतल शिंदे, स्थानिक व्यवस्था समितीचे कार्याध्यक्ष संजय पाताडे, शारीरिक शिक्षण व क्रीडा शिक्षक महासंघ सिंधुदुर्गचे जिल्हा अध्यक्ष बयाजी बुराण, विद्यालयाच्या प्राचार्या बी बी बिसुरे, विद्यालयाचे पर्यवेक्षक एस व्ही राणे, क्रीडा मार्गदर्शक माधुरी घराळ, विस्तार अधिकारी कणकवली कैलास राऊत, देवगड तालुका विस्तार अधिकारी दहिफळे, कणकवली तालुका समन्वयक दत्तात्रय मारकड, देवगड तालुका समन्वयक उत्तरेश्वर लाड, वैभववाडी तालुका समन्वयक रामचंद्र घावरे, मुख्याध्यापक प्रतिनिधी बाळासाहेब ढेरे आदी मान्यवर उपस्थित होते.
ग्रामीण भागातील खेळाडूंमध्ये सर्वाधिक टॅलेन्ट
नीलिमा अडसूळ पुढे म्हणाल्या की, ग्रामीण भागातील खेळाडूंमध्ये खूप मोठे टॅलेन्ट आहे. त्याला योग्य मार्गदर्शकांची आणि आधुनिक साहित्याची जोड देणे गरजेचे आहे. सांगली, सातारा, कोल्हापूर या जिल्ह्यांतील खेळाडूंबरोबरीने तुल्यबळ असा खेळ करतील असे खेळाडू आपणही तयार करायला हवेत. कोकणातील भौगोलिक परिस्थितीवर आणि वातावरणावर मात करून आपणास असे गुणवंत खेळाडू घडवावे लागणार आहेत, त्यासाठी मेहनतीशिवाय पर्याय असे स्पष्ट मत व्यक्त करून,इतर जिल्ह्यांच्या तूलनेने सिंधुदुर्गातील क्रीडा शिक्षक व खेळाडू प्रामाणिक आणि खिलाडीवृत्तीचे असल्याचे सांगत विशेष कौतुक केले.
या प्रसंगी मुख्याध्यापिका बी बी बिसुरे यांनी सर्व मान्यवरांचे तसेच तीन तालुक्यातून आलेल्या क्रीडा शिक्षकांचे स्वागत करून शालेय क्रीडा स्पर्धेला शुभेच्छा दिल्या. प्रमुख अतिथी म्हणून उपस्थित असलेले स्थानिक व्यवस्था समितीचे कार्याध्यक्ष संजय पाताडे म्हणाले की, शिस्त हाच प्रत्येक खेळाचा पाया असल्याचे त्यांनी याप्रसंगी नमूद करून शैक्षणिक वर्षातील सर्व स्पर्धांसाठी शुभेच्छा दिल्या.याप्रसंगी बयाजी बुराण यांनीही मनोगत व्यक्त केले.
दत्तात्रय मारकड यांची तालुका समन्वयकपदी नेमणूक
कासार्डे माध्यमिक व उच्च माध्यमिक विद्यालय कासार्डेचे क्रीडा शिक्षक दत्तात्रय मारकड यांच्या क्रीडा तसेच शैक्षणिक क्षेत्रातील भरीव योगदानाची आणि अनुभवाची दखल घेऊन सिंधुदुर्ग जिल्हा क्रीडा अधिकारी नीलिमा अडसूळ यांनी कणकवली तालुका समन्वयकपदी नियुक्ती केल्याचे पत्र देऊन अभिनंदन करीत पुढील वाटचालीसाठी त्यांना शुभेच्छा दिल्या.
