१ ऑगस्ट १९२५ ते १ ऑगस्ट २०२५ – एक तेजस्वी शतक ! श्री मावळी मंडळ, ठाणे या क्रीडा व शिक्षण क्षेत्रातील मातब्बर संस्थेने यंदा १ ऑगस्ट २०२५ रोजी आपली शताब्दी पूर्ण केली आहे. शिक्षण, संस्कार, समाजसेवा आणि क्रीडा या चारही पैलूंनी कार्यरत असलेली ही संस्था आता नव्या शतकात प्रवेश करत आहे.
एक सामाजिक संकल्पना ते संस्थात्मक वास्तू
१९२५ मध्ये काही क्रीडाप्रेमी, खास करून कबड्डीप्रेमी, समाजप्रेमी, दूरदृष्टी असलेल्या व्यक्तींनी शिक्षणाच्या माध्यमातून सामाजिक परिवर्तन घडवण्याच्या उद्देशाने ‘मावळी मंडळा’ची स्थापना केली. गेल्या शतकभरात संस्थेने हजारो विद्यार्थ्यांच्या आयुष्याला आकार दिला. सामाजिक भान, कलेची आवड, क्रीडा क्षमतांचा विकास व उत्तम नागरिकत्त्व यांची बीजे रुजवणं हे संस्थेचे प्रमुख वैशिष्ट्य राहिले आहे.
माझा मावळी परिवाराशी १७ वर्षांचा नातेसंबंध
गेल्या १७ वर्षांपासून मी या संस्थेत क्रीडा व शारीरिक शिक्षण शिक्षक म्हणून कार्यरत आहे. विद्यार्थ्यांना शारीरिक शिक्षणाचे महत्त्व समजावून देताना, त्यांच्या सर्वांगीण विकासाच्या प्रवासात सहभागी होणं, हे माझ्यासाठी अत्यंत समाधानदायक ठरले आहे. या काळात मी केवळ शिक्षक नव्हे, तर कर्तव्यनिष्ठ कार्यकर्ता म्हणून संस्थेच्या विविध उपक्रमांमध्ये सक्रिय राहिलो आहे.
क्रीडा क्षेत्रातील बदलती दिशा – पारंपरिकतेपासून आधुनिकतेकडे
पूर्वी मावळी मंडळात कबड्डी, आट्यापाट्या आणि विशेषतः मल्लखांब यासारखे पारंपरिक खेळ प्रामुख्याने खेळले जात. या खेळांनी विद्यार्थ्यांमध्ये शरीरसामर्थ्य, लवचिकता आणि संघभावना निर्माण केली. परंतु आज काळानुसार संस्थेने आधुनिक खेळांना देखील प्रोत्साहन दिले आहे. आता अॅथलेटिक्स, जिम्नॅस्टिक्स, स्केटिंग, फुटबॉल, खो-खो या विविध खेळांमध्ये संस्थेच्या खेळाडूंनी जिल्हा, राज्य आणि राष्ट्रीय स्तरावर उल्लेखनीय कामगिरी केली आहे. ही प्रगती संस्थेच्या क्रीडाविषयक दृष्टीकोनात आलेल्या सकारात्मक बदलांची साक्ष आहे.
शाळेसाठी शासन मान्यता – एक जबाबदारी, एक समाधान
संस्थेच्या शाळेच्या सुरुवातीच्या टप्प्यात शासन मान्यता व इतर आवश्यक परवानग्यांची संपूर्ण प्रक्रिया पूर्ण करण्याची जबाबदारी तत्कालीन अध्यक्षांनी माझ्यावर सोपवली होती. ही जबाबदारी मी विश्वासाने स्वीकारली आणि शासनस्तरावर सर्व औपचारिक प्रक्रिया यशस्वीरीत्या पूर्ण केली. शाळेला अधिकृत मान्यता मिळवून देताना मिळालेलं समाधान, हे माझ्या शैक्षणिक प्रवासातील एक अभिमानास्पद आणि अविस्मरणीय क्षण ठरला आहे.
खास स्मरण: आदरणीय माजी पदाधिकारी व मार्गदर्शक
माझ्या सेवाकाळात मला कै जोसेफ फर्नांडिस सर, कै सुरेश म्हात्रे, कै अशोक विरकर, कै मधुकर घाग, कै एडवर्ड फर्नांडिस अशा द्रष्ट्या आणि अष्टपैलू पदाधिकाऱ्यांबरोबर काम करण्याची संधी मिळाली. त्यांच्या दूरदृष्टी, समर्पणभाव आणि मूल्याधिष्ठित कार्यशैलीने मला नेहमीच प्रेरणा दिली आहे.
सद्यस्थितीतील नेतृत्व – अखंड वाटचालीचा आधार
आज संस्थेच्या यशस्वी वाटचाली मागे सन्माननीय ज्येष्ठ विश्वस्त प्रभाकर सुर्वे, कृष्णा डोंगरे, केशव मुकणे, तसेच विद्यमान अध्यक्ष सुधाकर मोरे, रमण गोरे, रवींद्र आंग्रे यांच्यासह अनेक ज्येष्ठ व कार्यक्षम पदाधिकाऱ्यांचे मोलाचे योगदान आहे. त्यांच्या मार्गदर्शनाखाली संस्था सकारात्मक ऊर्जा, पारदर्शकता आणि दृढ संकल्पनेच्या आधारावर अखंडपणे पुढे वाटचाल करत राहील, याची मला पूर्ण खात्री आहे.
शताब्दीचा मंत्र – परंपरेला मान, भविष्याला दिशा
शतकपूर्ती म्हणजे केवळ स्मरणरंजन नाही, तर ती नवी दिशा व संकल्प ठरवण्याची सुवर्णसंधी आहे. मावळी मंडळाचा उज्ज्वल वारसा पुढील पिढ्यांपर्यंत पोहोचवणं, हे आपलं सामूहिक दायित्व आहे.
श्री मावळी मंडळ – एक शतक, एक विचार, एक प्रेरणा !
शंभराव्या वर्धापन दिनाच्या सर्व मावळी कुटुंबियांना मनःपूर्वक शुभेच्छा!
– प्रमोद धोंडीराम वाघमोडे, क्रीडा व शारीरिक शिक्षण शिक्षक, श्री मावळी मंडळ हायस्कूल व ज्युनिअर कॉलेज, ठाणे आणि मुंबई विभाग संपर्क प्रमुख व जिल्हाध्यक्ष महाराष्ट्र राज्य क्रीडा व शारीरिक शिक्षण शिक्षक महासंघ.
