लंडन ः इंग्लंडविरुद्ध सुरू असलेल्या कसोटी मालिकेत टीम इंडियाचा कर्णधार शुभमन गिलने फलंदाजीने शानदार कामगिरी केली. गिलने या पाच सामन्यांच्या मालिकेत ७५४ धावा केल्या. शुभमन गिलने कसोटी मालिकेत कर्णधार म्हणून सर्वाधिक धावा करण्याचा ग्रॅहम गूच याचा विक्रम मोडला आहे. त्याला सर डॉन ब्रॅडमन यांचा विक्रम मोडण्याची संधी देखील होती, परंतु तो हा विक्रम ५६ धावांनी मोडण्यात कमी पडला.
कर्णधार म्हणून कसोटी मालिकेत सर्वाधिक धावा करण्याचा विक्रम ऑस्ट्रेलियाचे माजी महान खेळाडू सर डॉन ब्रॅडमन यांच्याकडे आहे. त्यांनी १९३६-३७ मध्ये इंग्लंडविरुद्धच्या मालिकेत ८१० धावा केल्या. आता शुभमन गिल या यादीत दुसऱ्या क्रमांकावर पोहोचला आहे, त्यांनी इंग्लंडविरुद्धच्या मालिकेत ७५४ धावा केल्या आहेत. गिलने इंग्लंडचे माजी कर्णधार ग्रॅहम गूचला मागे टाकले आहे. १९९० मध्ये भारताविरुद्धच्या मालिकेत त्यांनी ७५२ धावा केल्या. गिल सर डॉन ब्रॅडमन यांचा हा विक्रम मोडू शकला नाही.
गिल सुनील गावसकरांचा हा विक्रम मोडू शकला नाही
शुभमन गिलला सुनील गावसकरांचा आणखी एक विक्रम मोडण्याची संधी होती. हा विक्रम एका कसोटी मालिकेत सर्वाधिक धावा करणाऱ्या भारतीय फलंदाजाचा आहे. १९७१ मध्ये, महान फलंदाज सुनील गावसकरांनी त्याच्या पहिल्याच मालिकेत वेस्ट इंडिजविरुद्ध ७७४ धावा करून इतिहास रचला. गिल हा विक्रम मोडण्यापासून २१ धावा दूर राहिला.
कर्णधार गिलसाठी पहिली कसोटी मालिका खूप संस्मरणीय
कर्णधार म्हणून शुभमन गिलची ही पहिलीच मालिका आहे. ही मालिका आतापर्यंत त्याच्यासाठी खूप संस्मरणीय आहे. गिलने या मालिकेत पाच सामन्यांच्या १० डावांमध्ये ७५.४ च्या सरासरीने सर्वाधिक ७५४ धावा केल्या, ज्यामध्ये एका द्विशतकासह एकूण ४ शतके आहेत. तो इंग्लंडच्या भूमीवर कसोटी मालिकेत सर्वाधिक धावा करणारा आशियाई फलंदाज बनला आहे. एजबॅस्टन कसोटीच्या पहिल्या डावात त्याने २६९ धावा केल्या, जो इंग्लंडच्या भूमीवर कसोटीत कोणत्याही भारतीय फलंदाजाने केलेला सर्वोच्च धावा आहे.
