पाकिस्तानवर चार विकेट राखून विजय
बेलफास्ट ः पाकिस्तान महिला संघ सध्या आयर्लंड दौऱ्यावर आहे. दोन्ही संघांमध्ये तीन सामन्यांची टी २० मालिका खेळली जात आहे. मालिकेतील दुसरा सामना सिव्हिल सर्व्हिस क्लब बेलफास्ट येथे खेळला गेला. यात आयर्लंड संघाने ४ विकेट्सने विजय मिळवला. या सामन्यात आयर्लंड महिला संघाची फलंदाज जेन मॅग्वायर हिने विश्वविक्रम रचला आहे. महिला टी २० आंतरराष्ट्रीय सामन्यात शेवटच्या चेंडूवर षटकार मारून संघाला विजय मिळवून देणारी ती पहिली खेळाडू ठरली आहे. हा सामना जिंकून आयर्लंडने तीन सामन्यांच्या टी २० मालिकेत २-० अशी आघाडी घेतली आहे.
दुसऱ्या टी २० मध्ये नाणेफेक जिंकून प्रथम फलंदाजी करताना, पाकिस्तान महिला संघाने २० षटकांत ६ गडी गमावून १६८ धावा केल्या. सलामीवीर शवाल झुल्फिकार हिने पाहुण्या संघासाठी सर्वाधिक धावा केल्या. तिने २७ चेंडूत ६ चौकारांसह ३३ धावा केल्या. तिने यष्टीरक्षक-फलंदाज मुनिबा अली (२७) सोबत पहिल्या विकेटसाठी ४८ चेंडूत ६२ धावांची भागीदारी केली. पण या दोन्ही फलंदाजांना बाद केल्यानंतर, पाक महिला संघाच्या उर्वरित फलंदाजांना मोठी खेळी करता आली नाही. कर्णधार फातिमा सना आणि आयमन फातिमा या दोघीही २३-२३ धावा करून बाद झाल्या. आयर्लंडकडून कारा मरे आणि लारा मॅकब्राइड यांनी प्रत्येकी दोन बळी घेतले.
ओर्ला प्रेंडरगास्टच्या सर्वाधिक धावा
लक्ष्याचा पाठलाग करणाऱ्या यजमान संघाने शेवटच्या चेंडूवर रोमांचक विजय मिळवला. १६९ धावांच्या लक्ष्याचा पाठलाग करताना आयर्लंडची सुरुवात खराब झाली आणि एमी हंटर केवळ ६ धावा करून पॅव्हेलियनमध्ये परतली. यानंतर, कर्णधार गॅबी लुईस (२१) आणि ओर्ला प्रेंडरगास्टने डाव पुढे नेला. आयर्लंडकडून प्रेंडरगास्टने ३४ चेंडूत ४ चौकार आणि २ षटकारांसह सर्वाधिक ५१ धावा केल्या. लॉरा डेलानीने ३४ चेंडूत ४२ धावांची खेळी केली.
जेन मॅग्वायरने षटकार मारून संघाला सामना जिंकून दिला
शेवटी, रेबेका स्टोकेलने १६ चेंडूत ३४ धावा करून सामन्यात उत्साह निर्माण केला. त्याच वेळी, जेन मॅग्वायरने शेवटच्या चेंडूवर षटकार मारून संघाला मोठा विजय मिळवून दिला. आयर्लंडने २० षटकात ६ गडी गमावून १७१ धावा करत दुसरा टी २० सामना ४ गडी राखून जिंकला. पाकिस्तानकडून रमीन शमीम हिने सर्वाधिक तीन विकेट्स घेतल्या. लक्ष्याचा पाठलाग करताना शेवटच्या चेंडूवर षटकार मारून सामना जिंकणारी जेन महिला टी २० इतिहासातील पहिली खेळाडू ठरली. तिने सादिया इक्बालच्या चेंडूवर षटकार मारला.
