नवी दिल्ली ः इंग्लंडविरुद्ध नुकत्याच संपलेल्या पाच कसोटी सामन्यांच्या मालिकेत ७५४ धावा करणारा भारतीय कर्णधार शुभमन गिल याला मंगळवारी आयसीसीचा महिन्यातील सर्वोत्तम पुरुष खेळाडू (जुलै २०२५) म्हणून घोषित करण्यात आले. एजबॅस्टन येथे संघाच्या विजयात योगदान देणारे त्याचे द्विशतक तो नेहमीच लक्षात ठेवेल असे तो म्हणाला.
गिलने या दौऱ्यात कर्णधार आणि फलंदाज म्हणून तरुण खेळाडूंनी सजलेल्या भारतीय संघाला खूप प्रेरणा दिली. या पाच सामन्यांच्या मालिकेत त्याने चार शतके झळकावली, ज्यामुळे विराट कोहली आणि रोहित शर्मा सारख्या अनुभवी खेळाडूंच्या अनुपस्थितीतही भारतीय संघ इंग्लंडविरुद्ध मालिका २-२ अशी बरोबरीत आणण्यात यशस्वी झाला.
स्टोक्स आणि मुल्डरला टाकले मागे
इंग्लंडचा कर्णधार बेन स्टोक्स आणि दक्षिण आफ्रिकेचा अष्टपैलू खेळाडू वायन मुल्डरला हरवून गिलने हा पुरस्कार जिंकला. येत्या हंगामातही तो त्याची लय कायम ठेवेल अशी आशा गिलने व्यक्त केली. गिल म्हणाला, जुलैसाठी आयसीसीचा महिन्यातील सर्वोत्तम खेळाडू म्हणून निवड होणे खूप छान वाटते. यावेळी त्याचे महत्त्व आणखी जास्त आहे, कारण कर्णधार म्हणून माझ्या पहिल्या कसोटी मालिकेतील कामगिरीसाठी हा पुरस्कार मिळाला आहे. बर्मिंगहॅम (एजबॅस्टन मैदान) येथे झळकवलेले द्विशतक ही एक अशी कामगिरी आहे जी मी नेहमीच जपून ठेवेन आणि ती माझ्या इंग्लंड दौऱ्यातील खास क्षणांपैकी एक असेल.
गिलने मोठी कामगिरी केली
गिल हा चार वेळा आयसीसी महिन्यातील सर्वोत्तम खेळाडूचा पुरस्कार जिंकणारा पहिला पुरुष खेळाडू बनला आहे. त्याने जुलैमध्ये इंग्लंड दौऱ्यावर खेळलेल्या तीन कसोटी सामन्यांमध्ये ९४.५० च्या सरासरीने ५६७ धावा (एकूण ७५४ धावांपैकी) केल्या. यापूर्वी त्याने जानेवारी २०२३, सप्टेंबर २०२३ आणि फेब्रुवारी २०२५ मध्ये हा किताब जिंकला आहे. यादरम्यान, गिलने बर्मिंगहॅममध्ये खेळल्या गेलेल्या दुसऱ्या कसोटी सामन्यात एकूण ४३० धावा (पहिल्या डावात २६९ आणि दुसऱ्या डावात १६१) केल्या. ग्राहम गूच (४५६ धावा) नंतर कसोटीत फलंदाजाने केलेली ही दुसरी सर्वोच्च धावसंख्या आहे. या खेळींमुळे भारताला दुसरा सामना जिंकता आला आणि मालिका १-१ अशी बरोबरीत आणता आली.
महिला गटात इंग्लंडची डंकली सर्वोत्तम
महिला गटात इंग्लंडची सोफिया डंकली जुलै महिन्याची सर्वोत्तम खेळाडू म्हणून निवडली गेली. डंकलीने या सन्मानासाठी तिची सहकारी सोफी एक्लेस्टोन आणि आयर्लंडची कर्णधार गॅबी लुईस यांना मागे टाकले. या काळात तिने एकदिवसीय आणि टी-२० दोन्ही प्रकारात चमकदार कामगिरी केली. तिने घरच्या मैदानावर भारताविरुद्ध दोन्ही स्वरूपातील सातही सामने खेळले, तीन एकदिवसीय आणि चार टी-२० मध्ये एकूण २७० धावा केल्या.
