अर्जुन महेशच्या नेतृत्वाखाली अमेरिका संघाची चमकदार कामगिरी
दुबई ः अमेरिकेचा संघ शानदार कामगिरीसह १९ वर्षांखालील पुरुष विश्वचषकासाठी पात्र ठरला आहे. ही जागतिक स्पर्धा पुढील वर्षी झिम्बाब्वे आणि नामिबिया संयुक्तपणे आयोजित करणार आहे. त्यासाठी पात्र ठरणारा अमेरिका १६ वा आणि शेवटचा संघ ठरला आहे. यष्टीरक्षक फलंदाज अर्जुन महेशच्या नेतृत्वाखाली अमेरिकेने हे यश मिळवले आहे.
जॉर्जियातील रायडल येथे खेळल्या गेलेल्या डबल राउंड-रॉबिन क्वालिफायरमध्ये अमेरिकेने कॅनडा, बर्म्युडा आणि अर्जेंटिना यांना हरवले आणि एक सामना शिल्लक असताना या जागतिक स्पर्धेत आपले स्थान निश्चित केले. अमेरिकेने कॅनडावर ६५ धावांनी विजय मिळवून सुरुवात केली. त्यानंतर, त्यांनी बर्म्युडा आणि अर्जेंटिना संघांविरुद्ध मोठे विजय मिळवले. अमेरिकेच्या गोलंदाजांनी प्रभावी कामगिरी केली आणि परतीच्या सामन्यात बर्म्युडा आणि अर्जेंटिना यांना हरवून १० गुण मिळवले, जे विश्वचषकात त्यांचे स्थान निश्चित करण्यासाठी पुरेसे होते.
अव्वल क्रमांकाचा फलंदाज अमरिंदर सिंग गिलने तीन डावांमध्ये १९९ धावा केल्या तर अंश राय आणि साहिर भाटिया या फिरकी गोलंदाज जोडीने प्रत्येकी सात बळी घेतले. आता अमेरिकेचा संघ कॅनडाविरुद्ध शेवटचा सामना खेळणार आहे. दक्षिण आफ्रिकेत झालेल्या २०२४ च्या टप्प्यातील अव्वल १० संघ पूर्ण सदस्य यजमान झिम्बाब्वेसह २०२६ च्या स्पर्धेसाठी आपोआप पात्र ठरले आहेत.
या संघांचा समावेश १९ वर्षांखालील विश्वचषकात होईल
उर्वरित पाच संघ प्रादेशिक पात्रता फेरीतून निश्चित करण्यात आले. झिम्बाब्वे, ऑस्ट्रेलिया, बांगलादेश, इंग्लंड, भारत, आयर्लंड, पाकिस्तान, न्यूझीलंड, श्रीलंका, दक्षिण आफ्रिका आणि वेस्ट इंडिज हे संघ आपोआप पात्र ठरले तर अमेरिका, टांझानिया, अफगाणिस्तान, जपान आणि स्कॉटलंड हे प्रादेशिक पात्रता स्पर्धेतून निश्चित झाले.
