नांदेड ः २६ वी ज्युनियर व २५ वी सब ज्युनियर महाराष्ट्र राज्य सेपक टकरॉ स्पर्धेचे यजमानपद नांदेड जिल्ह्याला मिळाले आहे. येत्या २८ ते ३१ ऑगस्ट या कालावधीत राज्यस्तरीय सेपक टकरॉ स्पर्धा आयोजित करण्यात आली आहे.
नाशिक येथे राज्य संघटनेच्या सर्वसाधारण सभेत २०२५-२६ च्या २६ वी ज्युनियर व २५ वी सब ज्युनियर महाराष्ट्र राज्य सेपकटकरॉ स्पर्धेचे यजमानपद नांदेड जिल्ह्याला अवघ्या एका मताने देण्यात आले. सदरील राज्यस्तरीय सेपकटकरॉ स्पर्धेचे आयोजन २८ ते ३१ ऑगस्ट रोजी श्री गुरुगोविंदसिंगजी स्टेडियम नवीन इनडोअर हॉल, नांदेड येथे करण्यात येणार आहे.
या स्पर्धेसाठी सब ज्युनियर व ज्युनियर वयोगटाचे ७५० ते ८०० खेळाडू, ३० पंच प्रशिक्षक-संघ व्यवस्थापक १०० राज्य संघटनेचे पदाधिकारी २० असे मिळून १ हजार जण नांदेड येथे सहभागी होणार आहेत. या स्पर्धेसाठी नांदेड जिल्हा सेपकटकरॉ असोसिएशन नांदेडचे अध्यक्ष सुशीलकुमार जाधव, सचिव प्रवीण कुमार कुपटीकर, उपाध्यक्ष रूपेश पाडमुख, रविकुमार बकवाड, शुभम पाडदे, अनिकेत सरपाते, दिलीप सूर्यवंशी, सुमेध गायकवाड, असंग जोंधळे, निशांत कदम, आरती ठाकूर आदी स्पर्धा यशस्वी करण्यासाठी प्रयत्न करत आहेत.
