मुंबई ः जुहू विले पार्ले जिमखाना येथे आयोजित करण्यात आलेल्या पहिल्या राज्य मानांकन कॅरम स्पर्धेत मुंबईच्या अंबिका हरिथने अंतिम सामन्यात मुंबईच्या मिताली पाठकचा २४-११, २५-० असा सहज पराभव केला.
अंतिम फेरीत प्रवेश करण्यापूर्वी अंबिका हिने उपनगरच्या प्राजक्ता नारायणकर हिला तीन सेटपर्यंत रंगलेल्या लढतीत हरवले. या सेटमध्ये सातव्या बोर्ड अखेरीस अंबिकाकडे केवळ २१-२० अशी १ गुणाची नाममात्र आघाडी होती. परंतु शेवटच्या बोर्डात डावाची सुरुवात करण्याची संधी तिच्याकडे असल्याचा फायदा उठवत तिसरा सेट २५-२० अशा ५ गुणांच्या फरकाने ती जिंकली. दुसरीकडे मितालीने ठाण्याच्या समृद्धीवर सहज पण अनपेक्षित विजय मिळवला. तिसऱ्या क्रमांकासाठी झालेल्या लढतीत ठाण्याच्या समृद्धी घाडिगावकरने मुंबई उपनगरच्या प्राजक्ता नारायणकरला सहज नमवले.
पुरुष एकेरी गटात विजेतेपद पटकावताना मुंबईच्या महम्मद घुफ्रानने पुण्याच्या अभिजित त्रिपनकरवर २५-८, २५-२२ सरळ दोन सेटमध्ये विजय मिळावला. अंतिम सामन्यात प्रवेश करण्यापूर्वी घुफ्रानने वाजिद अंसारीला तर अभिजीत याने संदीप दिवेला नमवले. या गटाच्या तिसऱ्या क्रमांकाच्या लढतीत जळगावच्या संदीप दिवेने मुंबई उपनगरच्या वाजिद अंसारीवर सहज विजय नोंदवला.
विजेत्यांना जिमखान्याचे अध्यक्ष अनिल महेश, उपाध्यक्ष विजय मेहता, कार्यकारिणी सदस्य जगत किल्लावाला, इनडोअर सचिव संजीव शहा यांच्या हस्ते पारितोषिके देण्यात आली. या प्रसंगी महाराष्ट्र कॅरम असोसिएशनचे मानद सचिव अरुण केदार, खजिनदार अजित सावंत, उपाध्यक्ष यतिन ठाकूर व सहसचिव केतन चिखले आवर्जून उपस्थित होते. जुहू जिमखान्याचे अध्यक्ष अनिल महेश यांनी प्रतिवर्षी या स्पर्धेचे आयोजन करण्याचे आश्वासन जिमखान्याच्या वतीने दिले.
