निवड चाचणीत ४१५ खेळाडूंचा सहभाग
धुळे ः धुळे शहरातील जिल्हा क्रीडा संकुलात महाराष्ट्र राज्य ज्युनिअर व वरिष्ठ अॅथलेटिक्स अजिंक्यपद स्पर्धेसाठी निवड चाचणी पार पडली. अतिशय रंगतदार झालेल्या या निवड चाचणी स्पर्धेत जिल्हाभरातून ४१५ खेळाडू सहभागी झाले होते. यापैकी निवड झालेले ९३ खेळाडू राज्यस्तरावर धुळे जिल्ह्याचे प्रतिनिधित्व करणार आहेत.
धुळे जिल्हा क्रीडा संकुलात धुळे जिल्हा अॅथलेटिक्स असोसिएशनच्या वतीने निवड चाचणीचे आयोजन करण्यात आले होते. १४, १६, १८, २० व २३ वर्षांखालील गटात एकूण ४१५ खेळाडू या निवड चाचणीत सहभागी झाले होते. १०० मीटर धावणे, २०० मीटर धावणे, ४०० मीटर धावणे, ६०० मीटर, ८०० मीटर धावणे, ६० मीटर धावणे, लांब उडी, गोळा फेक, ४ बाय १०० रिले अशा वेगवेगळ्या क्रीडा प्रकारात खेळाडूंनी जिंकण्यासाठी कसब पणाला लावले.
या स्पर्धेतून ९३ गुणवंत खेळाडूंची राज्यस्तरीय स्पर्धेसाठी निवड करण्यात आली. हे खेळाडू बालेवाडी क्रीडा संकुल पुणे येथे २ ते ५ सप्टेंबर दरम्यान होणाऱ्या राज्यस्तरीय स्पर्धेत धुळे जिल्ह्याचे प्रतिनिधित्व करणार आहेत.
या स्पर्धेचे उद्घाटन क्रीडा अधिकारी मनोहर पाटील, डॉ योगेश पाटील, पोलिस उपनिरिक्षक धनराज भालपांडे, क्रीडा युवा शिक्षक संघटनेचे अध्यक्ष संदीप शिंदे यांच्या हस्ते करण्यात आले .पारितोषिक वितरण अमोल पाटील, असोसिएशनचे सचिव नरेंद्र पाटील, कोषाध्यक्ष हेमंत भदाणे यांच्या हस्ते करण्यात आले.
या स्पर्धेत पंच म्हणून विश्वास पाटील, प्रमोद पाटील, सुकदेव महाले, प्रशांत पाटील, विलास वळवी, हेमंत पाटील, गायत्री चव्हाण, तन्मय थोरात, अभिषेक शिंदे, मानव चव्हाण, प्रफुल्ल पाटील आदींनी परिश्रम घेतले. धुळे जिल्हा संघाला प्रशिक्षक प्रमोद पाटील व मॅनेजर विश्वास पाटील यांचे मार्गदर्शन लाभणार आहे.
