लंडन ः द हंड्रेड स्पर्धेत पुरुषांच्या अंतिम सामन्यात ओव्हल इनव्हिन्सिबल्स संघाने सलग तिसऱ्यांदा विजेतेपद पटकावले. नीता अंबानी यांच्या संघाने जेतेपद मिळवून एक नवा इतिहास रचला आहे.
नाणेफेक जिंकून प्रथम फलंदाजी करताना ओव्हन इनव्हिन्सिबल्स संघाने १०० चेंडूत पाच गडी गमावून १६८ धावा केल्या. विल जॅक्सने ४१ चेंडूत सात चौकार आणि दोन षटकारांसह ७२ धावा केल्या. त्याच वेळी, जॉर्डन कॉक्सने २८ चेंडूत चार चौकार आणि एका षटकारासह ४० धावा केल्या. ट्रेंट रॉकेट्स संघाकडून मार्कस स्टोइनिस याने दोन विकेट्स घेतल्या.
त्याच वेळी, १६९ धावांच्या लक्ष्याचा पाठलाग करताना, ट्रेंट रॉकेट्सचा संघ १०० चेंडूत आठ गडी गमावून केवळ १४२ धावा करू शकला. स्टोइनिसने सर्वाधिक धावा केल्या. त्याने ३८ चेंडूत चार चौकार आणि पाच षटकारांसह ६४ धावा केल्या. ओव्हल संघाकडून नाथन सॉटर याने तीन विकेट घेतल्या. ओव्हल संघाने सलग तिसऱ्यांदा विजेतेपद पटकावले आहे. यापूर्वी, २०२३ आणि २०२४ मध्ये हाच संघ चॅम्पियन बनला होता.
द हंड्रेड (महिला)
महिला संघात, सदर्न ब्रेव्हने प्रथम फलंदाजी करताना १०० चेंडूत सहा गडी बाद ११५ धावा केल्या. वायट हॉजने २५ धावा, सोफी डेव्हाईनने २३ धावा, फ्रेया कॅम्पने २६ धावा आणि मॅडिव्हिलियर्सने नाबाद १७ धावा केल्या. नॉर्दर्नकडून केट क्रॉस आणि अ‍ॅनाबेल सदरलँडने प्रत्येकी दोन बळी घेतले. नॉर्दर्न सुपरचार्जर्सने ८८ चेंडूत तीन गडी बाद करून ११६ धावांचे लक्ष्य गाठले. डेव्हिना पेरिनने १७ धावा केल्या. त्याच वेळी, फोबी लिचफिल्डने २६ धावांची खेळी केली. सदरलँडने २५ चेंडूत २८ धावा केल्या आणि निकोला केरीने २५ चेंडूत ३५ धावा केल्या आणि नाबाद राहिली. सदर्नकडून डेव्हाईन, मॅडी आणि क्लो ट्रायॉनने प्रत्येकी एक बळी घेतला.
