मुंबई ः बाळ गोपाळ (अभिलाषा) गणेशोत्सव मंडळ-काळाचौकी व आयडियल स्पोर्ट्स अकॅडमीतर्फे माजी नगरपाल डॉ. जगन्नाथराव हेगडे पुरस्कृत विविध जिल्ह्यातील १८ वर्षाखालील शालेय ३२ खेळाडूंमध्ये गणाधीश चषक विनाशुल्क कॅरम स्पर्धा जिंकण्यासाठी ५ सप्टेंबर रोजी चुरस होईल.
मुंबई शहर व उपनगर, ठाणे, पालघर, रत्नागिरी, सिंधुदुर्ग आदी जिल्ह्यातील उदयोन्मुख ज्युनियर कॅरमपटू स्पर्धेत सहभागी होणार आहेत. गत स्पर्धेस लाभलेल्या प्रतिसादामुळे शालेय कॅरम स्पर्धा आमच्या गणेशोत्सवामधील अविभाज्य उपक्रम होत असून पहिल्या ८ विजेत्या-उपविजेत्यांना आकर्षक चषकासह कॅरम स्ट्रायकर भेट दिले जाणार असल्याची माहिती गणाधीश मंडळाचे अध्यक्ष स्वप्नील शिंगे व सेक्रेटरी सिद्धेश ढोलम यांनी दिली.
गणाधीश श्री मंडपात चॅम्पियन कॅरम बोर्डवर रंगणाऱ्या स्पर्धेची उद्घाटनीय लढत ध्रुव भालेराव विरुद्ध पियुष कांबळे यामध्ये लायन्स क्लब ऑफ मिडटाऊनचे प्रमुख डॉ. जगन्नाथराव हेगडे, आयडियल स्पोर्ट्स अकॅडमीचे कार्याध्यक्ष गोविंदराव मोहिते, शिवछत्रपती पुरस्कार विजेते लीलाधर चव्हाण आदींच्या प्रमुख उपस्थितीत शुक्रवारी सकाळी ९ वाजता होईल. महात्मा गांधी विद्यामंदिरची राष्ट्रीय सबज्युनियर कॅरमपटू तनया दळवी, शिर्के हायस्कूल-रत्नागिरीची स्वरा मोहिरे, कळसुलकर इंग्लिश स्कूल-सावंतवाडीचा भारत सावंत व रुद्र चव्हाण, इंग्लिश स्कूल-जैतापूरचा आर्यन राऊत, राष्ट्रीय ख्यातीची ज्युनियर कॅरमपटू सिमरन शिंदे, कौस्तुभ जागुष्टे, पोद्दार अकॅडमी-मालाडचे प्रसन्न गोळे, आयईएस सुळे गुरुजी शाळेची ग्रीष्मा धामणकर, पार्ले टिळक विद्यालयाचा अमेय जंगम व सार्थक केरकर, श्री नारायण गुरु हायस्कूल-चेंबूरचा उमेर पठाण, चेंबूर हायस्कूलचा मयुरेश पवार, डॉ अँटोनियो दासिल्वा हायस्कूल-दादरचा ध्रुव भालेराव व ओमकार देसाई, शारदाश्रम विद्यामंदिर-दादरचा आरव अंजर्लेकर, जैन, कनोसिया हायस्कूलची वेदिका पोमेंडकर, जनरल एज्युकेशन अकॅडमीचे वेदांत लोखंडे, आयईएस पाटकर विद्यालय-डोंबिवलीचे प्रसाद माने, नील म्हात्रे व निधी सावंत आदी ज्युनियर कॅरमपटूमध्ये अटीतटीचे सामने होतील.
