छत्रपती संभाजीनगर ः चेन्नई (तामिळनाडू) येथे नुकत्याच झालेल्या चिल्ड्रन कॅडेट राष्ट्रीय किक बॉक्सिंग स्पर्धेत चैतन्य इंगळे याने कांस्यपदक पटकावले. या कामगिरीमुळे चैतन्य एशियन स्पर्धेसाठी भारताचे प्रतिनिधित्व करणार आहे.
चेन्नई येथे नुकत्याच झालेल्या चिल्ड्रन व कॅडेट राष्ट्रीय किकबॉक्सिंग अजिंक्यपद स्पर्धेत महाराष्ट्राचे प्रतिनिधित्व करताना चैतन्य इंगळे याने वयोगट ७ ते ९ वर्ष -३६ किलो आतील वजन गटात दोन फेऱ्या पार करीत कांस्यपदक पटकावले. त्याला प्रशिक्षक सुरेश मिरकर यांचे मार्गदर्शन लाभले आहे.
या कामगिरीमुळे चैतन्याची आगामी एशियन स्पर्धेसाठी भारतीय संघात निवड करण्यात आली आहे. या यशामुळे त्याचे छत्रपती संभाजीनगर जिल्हा व शहर किक- बॉक्सिंग संघटनेचे अध्यक्ष सुरेश मिरकर, किकबॉक्सिंग असोसिएशन महाराष्ट्राचे उपाध्यक्ष आणि छत्रपती संभाजीनगर जिल्हा संघटनेचे सचिव अनिल मिरकर, गरवारे कम्युनिटी सेंटरचे संचालक सुनील सुतावणे, सोनामाता शाळेच्या संचालिका विमल तळेगावकर यांनी अभिनंदन करून पुढील स्पर्धेसाठी शुभेच्छा दिल्या आहेत.
