अमेरिकन टेनिस स्पर्धेत नोंदवला १०० वा ग्रँड स्लॅम विजय
नवी दिल्ली ः जागतिक स्तरावरील अव्वल महिला टेनिसपटू अरिना सबालेंकाने चमकदार कामगिरी केली आणि वर्षातील शेवटच्या ग्रँड स्लॅम, यूएस ओपनमध्ये तिचे जेतेपद यशस्वीरित्या राखण्यासाठी अमांडा अनिसोवाला हरवले. एक तास ३४ मिनिटे चाललेल्या अंतिम सामन्यात सबालेंकाने अनिसोवाला ६-३, ७-६(३) ने पराभूत केले. सबालेंकाचे हे चौथे ग्रँड स्लॅम जेतेपद आहे.
अव्वल क्रमांकाचा मुकुट कायम राखला
सबालेंकाने अंतिम फेरीत आक्रमक खेळ दाखवला. तिने १३ विनर मारले आणि १५ अनफोर्स्ड एरर्स केल्या. दुसरीकडे, अनिसोव्हाने २९ अनफोर्स्ड एरर्स केल्या आणि सात डबल फॉल्ट केले. पहिल्या सेटमध्ये कठीण लढतीनंतर सबालेंकाने तिच्या अनुभवाचा पुरेपूर वापर केला. दुसऱ्या सेटमध्येही सलाबेंकाने अमेरिकन तरुण अनिसोवापेक्षा चांगली असल्याचे सिद्ध केले आणि सलग सेटमध्ये विजय मिळवला. या काळात सबालेंकाने चार वेळा तिची सर्व्हिस गमावली, तथापि, जेतेपद जिंकल्याने तिने नंबर वनचा मुकुट कायम ठेवला आहे, तर पराभवानंतरही अनिसोवा चौथ्या स्थानावर पोहोचेल.
हार्ड कोर्टवर पहिले चार ग्रँड स्लॅम जिंकले
सबालेंकाने या जेतेपदासह अनेक विक्रम केले आहेत. हार्ड कोर्टवर पहिले चार ग्रँड स्लॅम जिंकणारी ती ओपन एरामधील तिसरी खेळाडू आहे. या बाबतीत तिने नाओमी ओसाका आणि किम क्लिस्टर्सची बरोबरी केली आहे. ओसाकाने तिच्या कारकिर्दीत यूएस ओपन (२०१८ आणि २०२०) आणि ऑस्ट्रेलियन ओपन (२०१९, २०२१) जिंकले आहे. क्लिस्टर्सने २००५, २००९ आणि २०१० मध्ये यूएस ओपन आणि २०११ मध्ये ऑस्ट्रेलियन ओपन जिंकले.
सेरेना विल्यम्सशी बरोबरी केली
सबालेंका ही ओपन एरामधील दुसरी खेळाडू आहे जिने तिच्या ग्रँड स्लॅम कारकिर्दीचा १०० वा सामना अंतिम फेरीत जिंकला. यापूर्वी, विम्बल्डन दरम्यान इगा स्विटेकने ही कामगिरी केली होती. दोन्ही खेळाडूंनी अंतिम सामन्यात अनिसोवाला हरवले आणि त्यांच्या ग्रँड स्लॅम कारकिर्दीतील १०० वा सामना जिंकला. त्याच वेळी, २०१२-२०१४ मध्ये सेरेना विल्यम्सनंतर यूएस ओपनच्या महिला एकेरी प्रकारात सलग दोन जेतेपदे जिंकणारी सबालेंका ही पहिली खेळाडू आहे.
सबालेंकापूर्वी, ओपन युगात काही मोजक्याच खेळाडूंनी ही कामगिरी केली आहे. या यादीत सेरेना विल्यम्स (२०१२-२०१४), किम क्लिस्टर्स (२००९-२०१०), व्हीनस विल्यम्स (२०००-२००१), मोनिका सेल्स (१९९१-१९९२), स्टेफी ग्राफ (१९८८-१९८९, १९९५-१९९६), मार्टिना नवरातलोवा (१९८३-१९८४, १९८६-१९८७) आणि ख्रिस एव्हर्ट (१९७५-१९७८) यांचा समावेश आहे.
