बीसीसीआय सरकारच्या मार्गदर्शक तत्वांचे पालन करत आहे – सैकिया
मुंबई ः आशिया कप क्रिकेट स्पर्धा सुरू होण्यापूर्वीच भारत आणि पाकिस्तान यांच्यातील सामन्याबाबत क्रीडा आणि राजकीय दोन्ही स्तरावर चर्चा सुरू आहे. भारतीय संघ १० सप्टेंबर रोजी यूएईविरुद्ध पहिला सामना खेळेल, त्यानंतर १४ सप्टेंबर रोजी ग्रुप स्टेजमध्ये पाकिस्तान संघाशी सामना करेल. दोन्ही देशांमधील अलिकडच्या लष्करी तणावामुळे, चाहत्यांचा एक मोठा वर्ग भारताला कोणत्याही स्पर्धेत पाकिस्तानविरुद्ध खेळू नये असे वाटते. काही लोक असेही म्हणत आहेत की भारताने आयसीसी किंवा इतर बहु-राष्ट्रीय स्पर्धेमध्ये पाकिस्तान संघासोबत सामने खेळण्यास नकार द्यावा.
आशिया कपचे वेळापत्रक जाहीर झाल्यापासून, बरेच लोक भारतीय संघ पाकिस्तानसोबत खेळण्याच्या बाजूने नाहीत. बरेच लोक याबद्दल सोशल मीडियावर मोहीम देखील चालवत आहेत. या वादाच्या पार्श्वभूमीवर, आता बीसीसीआयचे सचिव देवजीत सैकिया यांचे स्पष्टीकरण आले आहे. एनडीटीव्हीशी बोलताना ते म्हणाले की बोर्ड सरकारने बनवलेल्या मार्गदर्शक तत्त्वांचे पालन करत आहे आणि त्यानुसार भारतीय संघाचा सहभाग निश्चित केला जातो.
देवजित सैकिया म्हणाले की, केंद्र सरकारच्या क्रीडा विभागाने क्रिकेट असो किंवा इतर कोणत्याही खेळात भारतीय संघाच्या सहभागाबाबत स्पष्ट मार्गदर्शक तत्वे तयार केली आहेत. धोरण बनवताना, सरकारने राष्ट्रीय स्तरावरील क्रीडा संघटनांना दिशा मिळावी आणि त्या आधारावर बहु-राष्ट्रीय स्पर्धांमध्ये सहभागाचा निर्णय घेता यावा यासाठी पूर्ण खबरदारी घेतली आहे.
तरुण खेळाडूंचे भविष्य धोक्यात येईल
पाकिस्तानशी क्रीडा संबंध पूर्णपणे तोडणे शक्य नाही, असेही त्यांनी स्पष्ट केले. असे केल्याने आंतरराष्ट्रीय क्रिकेट परिषद (आयसीसी) किंवा आशियाई क्रिकेट परिषद (एसीसी) सारख्या संघटनांकडून कठोर निर्बंधांना सामोरे जावे लागू शकते. याशिवाय, उदयोन्मुख खेळाडूंच्या कारकिर्दीवर याचा परिणाम होईल.
सैकिया म्हणाले की, जर एखाद्या संघाने बहु-राष्ट्रीय स्पर्धेत भाग घेतला नाही तर संबंधित महासंघावर बंदी घालण्यात येऊ शकते. अशा परिस्थितीत तरुण खेळाडूंचे भविष्य धोक्यात येईल. म्हणूनच केंद्र सरकारने सर्व पैलू लक्षात घेऊन धोरण तयार केले आहे.
