चेन्नई ः ग्लोबल चेस लीगच्या तिसऱ्या हंगामासाठी प्लेयर ड्राफ्ट शुक्रवारी होणार आहे. त्यामध्ये विश्वविजेता डी गुकेश, पाच वेळा विश्वविजेता विश्वनाथन आनंद आणि आर प्रज्ञानंद हे आयकॉन खेळाडू आहेत. जागतिक क्रमवारीत अव्वल स्थानावर असलेला नॉर्वेचा मॅग्नस कार्लसन १३ ते २४ डिसेंबर दरम्यान चेन्नई येथे होणाऱ्या या स्पर्धेत सहभागी होत नाही. तो गेल्या दोन हंगामात युएई आणि लंडनमध्ये खेळला होता.
टेक महिंद्रा आणि फिड यांच्या संयुक्त स्पर्धेत असलेल्या जीसीएलमध्ये सहा फ्रँचायझी आहेत. ३६ खेळाडूंच्या ड्राफ्ट पूलमध्ये अमेरिकन ग्रँडमास्टर्स हिकारू नाकामुरा, फॅबियानो कारुआना, अलिरेझा फिरोजा आणि फ्रान्सचे मॅक्सिम वाचियर-लाग्रेव्ह यांचाही समावेश आहे.
नेदरलँड्सचा अनिश गिरी, भारताचा अर्जुन एरिगेसी, विश्वचषक उपविजेता कोनेरू हम्पी आणि चार वेळा विश्वविजेता हौ यिफान सारखे स्टार खेळाडू देखील समाविष्ट असतील. या पूलमध्ये ‘आयकॉन’, ‘पुरुष’, ‘महिला’ आणि ‘२१ वर्षांखालील’ श्रेणी असतील. प्रत्येक फ्रँचायझी सहा खेळाडूंची निवड करेल, ज्यामध्ये एक आयकॉन, दोन पुरुष, दोन महिला आणि एक २१ वर्षांखालील खेळाडू असेल.
तिसऱ्या हंगामातील फ्रँचायझींमध्ये गतविजेता त्रिवेणी कॉन्टिनेंटल किंग्ज, पीबीजी अलास्कन नाईट्स, अपग्रॅड मुंबा मास्टर्स, गेंजेस ग्रँडमास्टर्स, अल्पाइन एसजी पायपर्स आणि अमेरिकन गॅम्बिट्झ यांचा समावेश आहे. गेल्या वर्षी चीनच्या डिंग लिरेनविरुद्धच्या वर्ल्ड चॅम्पियनशिप सामन्यामुळे गुकेश सहभागी झाला नव्हता.
