जळगाव : जिल्हा क्रीडा अधिकारी कार्यालय, जळगाव शहर महानगरपालिका व जळगाव जिल्हा बुद्धिबळ संघटना यांच्या संयुक्त विद्यमाने, तसेच जैन स्पोर्ट्स अकॅडमीच्या विशेष सहकार्याने मनपा स्तरीय आंतरशालेय बुद्धिबळ स्पर्धा कांताई सभागृहात मोठ्या उत्साहात पार पडली.
या स्पर्धेत ३५ शाळांमधून १०१ मुले व ७६ मुली सहभागी झाल्या. तब्बल आठ डावांच्या लढतींमध्ये उत्कंठापूर्ण सामने खेळवण्यात आले. त्यातून प्रत्येकी पाच खेळाडूंची विभागीय स्तरासाठी निवड करण्यात आली. विजेत्या व निवड झालेल्या खेळाडूंना जैन स्पोर्ट्स अकॅडमीतर्फे सुवर्ण, रौप्य व कांस्यपदक देऊन गौरविण्यात आले.
मुलांच्या गटात तसीन रफीक तडवी (सेंट टेरेसा) प्रथम, तर आरुष अक्षय सरोदे (सेंट जोसेफ), अर्णव आशुतोष मंडोरे (सेंट जोसेफ), शौर्य मनीष बाहेती (सेंट तेरेसा), चिन्मय सचिन मगर (सेंट जोसेफ) यांनी उल्लेखनीय कामगिरी केली. प्रकाश शर्मा (सेंट लॉरेन्स) राखीव म्हणून निवडला गेला.
मुलींच्या गटात विद्या विनोद बागुल (अनुभूती) प्रथम, तर लावण्या प्रदीप चव्हाण (सेंट लॉरेन्स), बुशरा इरफान खाटीक (इकरा शाईन), शिफा जमील खाटीक (मनपा शाळा क्र १), अलिया अमीन खान (इकरा शाईन) यांनी चमकदार कामगिरी केली. अस्मिजान शेख (इकरा शाईन) राखीव ठरली.
स्पर्धेतील विजेत्यांना महाराष्ट्र राज्य बुद्धिबळ संघटनेचे उपाध्यक्ष फारुख शेख व जिल्हा बुद्धिबळ संघटनेचे प्रवीण ठाकरे यांच्या हस्ते पारितोषिके देण्यात आली. स्पर्धेत प्रवीण ठाकरे यांनी मुख्य पंच तर आकाश धनगर, दीपक सावळे, प्रशांत पाटील व सोमदत्त तिवारी यांनी सहाय्यक पंच म्हणून काम पाहिले.या स्पर्धेतून निवड झालेल्या खेळाडू आता विभागीय स्तरावर आपले कौशल्य आजमावणार असून, जळगावच्या चालींचे सामर्थ्य पुढे आणतील अशी अपेक्षा व्यक्त होत आहे.
